ரன் எடுக்காமலே பேட்டிங்கில் சாதனை புரிந்த மே.இ. தீவுகள் வீரர்: இப்படியும் சாதிக்கலாம்!

மேற்கிந்தியத் தீவுகளின் கம்மின்ஸ் 45 பந்துகளை எதிர்கொண்டு ரன் எடுக்காமல் ஆட்டமிழந்து வரலாற்றுச் சாதனையில் இடம்பிடித்துள்ளார். 

இந்தியாவுக்கு எதிரான முதல் டெஸ்ட் ஆட்டத்தின் முதல் இன்னிங்ஸில் மேற்கிந்தியத் தீவுகள் அணி 222 ரன்களுக்கு ஆட்டமிழந்தது. அந்த அணியில் 10-வது பேட்ஸ்மேனாக களமிறங்கிய மிகுவெல் கம்மின்ஸ் ஜேசன் ஹோல்டருடன் இணைந்து பாட்னர்ஷிப் அமைத்தார். இவர் சாதுரியமாக ரன் குவிக்க முயலாமல் ஹோல்டருக்கு நல்ல ஒத்துழைப்புத் தந்தார். இதைப் பயன்படுத்திய ஹோல்டர் ஓரளவு ரன் சேர்த்தார். இதனால், 3-வது நாள் ஆட்டத்தின் முதல் செஷனில் இந்தியா விக்கெட் வீழ்த்த திணறியது. 

இதையடுத்து, ஹோல்டர் ஒருவழியாக 39 ரன்களுக்கு ஆட்டமிழந்தார். அவரைத்தொடர்ந்து, கம்மின்ஸும் அடுத்த ஓவரில் முதன்முறையாக ரன் எடுக்க முயன்று 45-வது பந்தில் ஜடேஜா ஓவரில் போல்டானார். இதனால், 45 பந்துகளை எதிர்கொண்ட அவரால் கடைசி வரை ரன் கணக்கைத் தொடங்க முடியவில்லை. 

இதன்மூலம், அவர் பிரத்யேகமான சாதனையைப் புரிந்துள்ளார். ரன் ஏதும் எடுக்காமலே களத்தில் அதிக நேரத்தைச் செலவிட்டவர்கள் வரிசையில் இவர் தற்போது இரண்டாம் இடத்தைப் பிடித்துள்ளார். 

1999-இல் தென் ஆப்பிரிக்காவுக்கு எதிரான ஆட்டத்தில், நியூஸிலாந்து வீரர் ஜியோஃப் அல்லாட் 101 நிமிடங்கள் களத்தில் இருந்து ரன் ஏதும் எடுக்காமல் ஆட்டமிழந்தார். தற்போது கம்மின்ஸ் இவருக்கு அடுத்தபடியாக 95 நிமிடங்கள் களத்தில் இருந்து ரன் ஏதும் எடுக்காமல் ஆட்டமிழந்துள்ளார்.