இத்தாலிக்கு எதிரான டேவிஸ் கோப்பை போட்டியில் இந்திய அணி தோல்வியடைந்துள்ளது.
டேவிஸ் கோப்பை புதிய முறையின்படி வரும் நவம்பர் மாதம் மாட்ரிட்டில் உலக குரூப் பைனல்ஸ் போட்டிகள் நடக்கின்றன. இதில் தேர்வு பெறுவதற்கான தகுதி ஆட்டங்கள் உலகம் முழுவதும் பிப். 1, 2 தேதிகளில் 12 நகரங்களில் நடக்கிறது. கொல்கத்தா செளத் கிளப்பில் இந்தியா-இத்தாலி மோதிய தகுதி ஆட்டம் வெள்ளிக்கிழமை தொடங்கியது. முதலில் ஒற்றையர் ஆட்டங்கள் நடைபெற்றன. களிமண் தரையில் வலுவான அணியான இத்தாலியை எதிர்கொள்ளும் வகையில் போட்டி புல்தரை மைதானத்தில் நடத்தப்பட்டது. இதனால்
முதல் ஒற்றையர் ஆட்டத்தில் உலகின் 37-ஆம் நிலை வீரர் ஆன்ட்ரியஸ் சிப்பியும்--இந்தியாவின் ராம்குமார் ராமநாதனும் மோதினர். தொடக்கத்தில் சிப்பி தடுமாறினாலும், ஆட்டத்தில் தனது ஆதிக்கத்தை நிலைநாட்டி 6-4, 6-2 என நேர் செட்களில் ராம்குமாரை வென்றார். இரண்டாவது ஒற்றையர் ஆட்டத்தில் இந்தியாவின் நம்பர் ஒன் வீரர் பிரஜ்னேஷ் குணேஸ்வரன்-இத்தாலியின் மேட்டியோ பெர்ரட்னியை எதிர்கொண்டார். ஆனால் எந்த சிக்கலும் இன்றி மேட்டியோ 6-4, 6-3 என்ற செட் கணக்கில் பிரஜ்னேஷை வீழ்த்தினார். இதன் மூலம் 5 ஆட்டங்கள் கொண்ட இதில் 2--0 என இத்தாலி முன்னிலை பெற்றது. போட்டியில் வெல்ல மீதமுள்ள இரட்டையர், 2 மாற்று ஒற்றையர் ஆட்டங்களில் வெல்ல வேண்டிய நிலைக்கு இந்தியா தள்ளப்பட்டது.
இன்று நடைபெற்ற இரட்டையர் ஆட்டத்தில், சைமோன் பொலேலி - மேட்டியோ பெர்ரட்னி இணையை எதிர்கொண்டது இந்தியாவின் போபண்ணா-திவிஜ் சரண் இணை. இதில், 4-6, 6-3, 6-4 என்ற செட் கணக்கில் வென்றது இந்திய அணி.
எனினும் 4-வது ஆட்டத்தில் இந்திய அணி தோல்வியடைந்தது. பிரஜ்னேஷ் குணேஸ்வரன், ஆன்ட்ரியஸ் சிப்பியிடம் 1-6, 4-6 என்ற செட் கணக்கில் தோற்றார். இதையடுத்து 3-1 என்கிற கணக்கில் இந்தியாவைத் தோற்கடித்தது இத்தாலி அணி.