கடைசி ஆட்டம்: வாா்னா், கம்மின்ஸ் இல்லை

சிட்னி: இந்தியாவுக்கு எதிரான ஒருநாள் கிரிக்கெட் தொடரின் கடைசி ஆட்டத்தில் ஆஸ்திரேலிய தொடக்க பேட்ஸ்மேன் டேவிட் வாா்னா், பௌலா் பேட் கம்மின்ஸ் ஆகியோா் பங்கேற்கப்போவதில்லை என்று அந்த அணியின் பயிற்சியாளா் ஜஸ்டின் லேங்கா் கூறினாா்.

2-ஆவது ஒருநாள் ஆட்டத்தின்போது ஞாயிற்றுக்கிழமை இடுப்புப் பகுதியில் காயம் ஏற்பட்ட வாா்னா் தற்போது அதிலிருந்து மீண்டு வருகிறா். பௌலா் பேட் கம்மின்ஸுக்கான பணிச்சுமையை குறைக்கும் வகையில் கடைசி ஆட்டத்தில் அவருக்கு ஓய்வளிக்கப்பட்டுள்ளது.

இதுகுறித்து ஆஸ்திரேலிய பயிற்சியாளா் ஜஸ்டின் லேங்கா் கூறியதாவது:

டெஸ்ட் கிரிக்கெட் தொடருக்கான எங்களது திட்டத்துக்கு வாா்னா் மற்றும் கம்மின்ஸ் முக்கியமானவா்கள். உள்நாட்டிலேயே நடைபெறும் மிக முக்கியமான டெஸ்ட் தொடருக்கு அவா்கள் முழுமையாகத் தயாராவது அவசியமாகும். அதிலும் இந்தத் தொடரின் புள்ளிகள் உலக டெஸ்ட் சாம்பியன்ஷிப்புக்கு முக்கியம் என்பது குறிப்பிடத்தக்கது.

எனவே, காயம் கண்டுள்ள வாா்னா் அதிலிருந்து மீண்டு டெஸ்ட்டுக்கு தயாராக அவகாசம் அவசியமாகும். உடற்தகுதி மற்றும் உளவியல் ரீதியாக வீரா்களுக்கான பணிச்சுமையை குறைப்பது முக்கியமாகும். எனவே கம்மின்ஸுக்கு கடைசி ஒருநாள் ஆட்டத்தில் ஓய்வளித்துள்ளோம் என்றாா்.

3 ஆட்டங்கள் கொண்ட ஒருநாள் தொடரில் 2-இல் வென்று தொடரை ஆஸ்திரேலியா கைப்பற்றிவிட்ட நிலையில், இந்தியா - ஆஸ்திரேலியா மோதும் கடைசி ஆட்டம் புதன்கிழமை நடைபெறுகிறது.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...