உலகின் நெ.1 ஆல்ரவுண்டர் ஆனார் பென் ஸ்டோக்ஸ்
By DIN | Published On : 21st July 2020 03:16 PM | Last Updated : 21st July 2020 03:16 PM | அ+அ அ- |
ஐசிசி தரவரிசையில் உலகின் நெ.1 ஆல்ரவுண்டர் என்கிற பெருமையைப் பெற்றுள்ளார் இங்கிலாந்தின் பென் ஸ்டோக்ஸ்.
இங்கிலாந்துக்கு எதிரான முதல் டெஸ்டில் மேற்கிந்தியத் தீவுகள் அணி 4 விக்கெட் வித்தியாசத்தில் வென்றது. இதனால் 3 ஆட்டங்கள் கொண்ட டெஸ்ட் தொடரில் 1-0 என முன்னிலை பெற்றது மேற்கிந்தியத் தீவுகள் அணி. எனினும் 2-வது டெஸ்டை 113 ரன்கள் வித்தியாசத்தில் வென்றுள்ளது இங்கிலாந்து அணி. பேட்டிங், பந்துவீச்சு என இரண்டிலும் அசத்திய பென் ஸ்டோக்ஸ், ஆட்ட நாயகனாகத் தேர்வு செய்யப்பட்டார். இதனால் டெஸ்ட் தொடர் 1-1 சமனில் உள்ளது. 3-வது டெஸ்ட், மான்செஸ்டரில் ஜூலை 24 அன்று நடைபெறவுள்ளது.
இந்நிலையில் ஐசிசி வெளியிட்டுள்ள புதிய டெஸ்ட் தரவரிசையில் ஹோல்டரைப் பின்னுக்குத் தள்ளி உலகின் நெ.1 ஆல்ரவுண்டர் என்கிற பெருமையைப் பெற்றுள்ளார் ஸ்டோக்ஸ். 2006-ல் ஆண்ட்ரூ பிளிண்டாஃப் முதல் இடத்தைப் பிடித்த பிறகு இந்த உயரத்தை அடைந்த இங்கிலாந்து வீரர் ஸ்டோக்ஸ் தான்.
அதேபோல பேட்டிங் தரவரிசையில் 3-வது இடத்துக்கு அவர் முன்னேறியுள்ளார். ஸ்டூவர்ட் பிராட், பந்துவீச்சுத் தரவரிசையில் 10-ம் இடம் பிடித்துள்ளார்.
மே.இ. தீவுகள் அணியின் கேப்டன் ஜேசன் ஹோல்டர், பந்துவீச்சுத் தரவரிசையில் 3-ம் இடமும் ஆல்ரவுண்டர்கள் தரவரிசையில் 2-ம் இடமும் பிடித்துள்ளார்.
