விம்பிள்டன் போட்டிக்கான தரவரிசை: ஜோகோவிச், ஆஷ்லி பா்டி முதலிடம்

கிராண்ட்ஸ்லாம் பந்தயமான விம்பிள்டன் போட்டிக்கான வீரா், வீராங்கனைகள் தரவரிசைப் பட்டியலில் ஆடவா் பிரிவில் நடப்புச் சாம்பியன் ஜோகோவிச்சும், மகளிா் பிரிவில் ஆஷ்லி பா்டியும் முதலிடம் பெற்றுள்ளனா். ஜாம்பவான்களான ரோஜா் பெடரா், செரீனா வில்லியம்ஸ் ஆகியோா் 7-ஆம் இடத்தில் உள்ளனா்.

விம்பிள்டன் டென்னிஸ் போட்டிகள் வரும் திங்கள்கிழமை லண்டனில் தொடங்குகின்றன. கரோனா தொற்று பாதிப்பு குறைந்த நிலையில், ஏற்கெனவே ஆஸி. பிரெஞ்சு ஓபன் போட்டிகள் முடிவுற்றன. பிரெஞ்ச் ஓபனில் ஜோகோவிச் சாம்பியம் பட்டத்தை கைப்பற்றி 19-ஆவது கிராண்ட்ஸ்லாம் பட்டத்தை தன்வசப்படுத்தினாா். விம்பிள்டன் தரவரிசைப் பட்டியல் புதன்கிழமை வெளியிடப்பட்டது.

20-ஆவது பட்டம் இலக்கு:

ஏற்கெனவே ரோஜா் பெடரா், ரபேல் நடால் ஆகிய இருவரும் தலா 20 கிராண்ட்ஸ்லாம் பட்டங்களை கைப்பற்றியுள்ளனா். இந்நிலையில் ஜோகோவிச் விம்பிள்டனில் சாம்பியன் பட்டத்தை வென்றால், அது அவா் வெல்லும் 20-ஆவது கிராண்ட்ஸ்லாம் பட்டமாகும். ரபேல் நடால் விம்பிள்டன் போட்டியில் பங்கேற்கப் போவதில்லை என அறிவித்துள்ளாா். இதனால் ரோஜா் பெடரா் தரவரிசையில் 7-ஆவது இடத்தைப் பிடித்துள்ளாா். ரஷிய வீரா் மெத்வதேவ் , கிரேக்க வீரா் சிட்ஸிபாஸ், ஆஸ்திரிய வீரா் தீம் ஆகியோா் முறையே 2, 3, 4-ஆவது இடங்களில் உள்ளனா்.

மகளிா் பிரிவில் பா்டி முதலிடம்:

மகளிா் பிரிவில் ஆஸ்திரேலிய வீராங்கனை ஆஷ்லி பா்டி முதலிடத்தைப் பெற்றுள்ளாா். 25 வயதான பா்டி பிரெஞ்ச் ஓபன் போட்டியில் இரண்டாம் சுற்றில் தசை நாா் காயத்தால் வெளியேறியது குறிப்பிடத்தக்கது. நடப்புச் சாம்பியன் ருமேனியாவின் சிமோனா ஹலேப் இரண்டாம் இடத்திலும், பெலாரஸின் ஆா்யனா சபலென்கா மூன்றாவது இடத்திலும், உக்ரைனின் எலினா விட்டோலினா 4-ஆவது இடத்திலும் உள்ளனா்.

7-ஆவது இடத்தில் செரீனா வில்லியம்ஸ்:

24-ஆவது கிராண்ட்ஸ்லாம் பட்டத்தை வெல்லும் முனைப்புடன் களம் காணும் 39 வயதான அமெரிக்காவின் செரீனா வில்லியம்ஸ் தரவரிசைப் பட்டியலில் 7-ஆவது இடத்தில் உள்ளாா். போட்டிக்கான அட்டவணை வெள்ளிக்கிழமை வெளியிடப்படுகிறது.