ஆசியக் கோப்பை தகுதிச்சுற்று: ஒரு இடத்துக்குப் போட்டியிடும் மூன்று அணிகள்!

ஆசியக் கோப்பை டி20 கோப்பை தகுதிச்சுற்று ஆட்டங்கள் இறுதிக்கட்டத்தை அடைந்துள்ளன.

ஆசிய கிரிக்கெட் கவுன்சில், ஆசியக் கோப்பைப் போட்டியை 1984 முதல் நடத்தி வருகிறது. 50 ஓவர், டி20 என இரு வகைகளிலும் இப்போட்டி நடைபெறும். இந்திய அணி ஆசியக் கோப்பை ஏழு முறை வென்றுள்ளது. 2022 ஆசியக் கோப்பைப் போட்டி இலங்கையில் நடைபெறுவதாக இருந்தது. இலங்கையில் ஏற்பட்ட பொருளாதார நெருக்கடி மற்றும் மக்களின் தொடர் போராட்டங்கள் காரணமாக இலங்கைக்குப் பதிலாக ஐக்கிய அரபு அமீரகத்தில் ஆசிய கோப்பை டி20 போட்டி நடைபெறுகிறது. ஆகஸ்ட் 27 முதல் செப்டம்பர் 11 வரை நடைபெறவுள்ள போட்டியில் ஆகஸ்ட் 28 அன்று இந்தியா - பாகிஸ்தான் அணிகள் மோதுகின்றன.

இந்தியா, பாகிஸ்தான், தகுதிச்சுற்று அணி என மூன்று அணிகள் குரூப் ஏ பிரிவிலும் இலங்கை, ஆப்கானிஸ்தான், வங்கதேசம் ஆகிய அணிகள் குரூப் பி பிரிவிலும் இடம்பெற்றுள்ளன. இரு பிரிவுகளிலும் முதல் இரண்டு இடங்களைப் பிடிக்கும் அணிகள் சூப்பர் 4 சுற்றில் மோதவுள்ளன. 

ஆகஸ்ட் 20 முதல் 24 வரை நடைபெறும் ஆசியக் கோப்பை டி20 கோப்பை தகுதிச்சுற்றுப் போட்டியில் ஐக்கிய அரபு அமீரகம், குவைத், சிங்கப்பூர், ஹாங்காங் ஆகிய நாடுகள் விளையாடுகின்றன. ஒவ்வொரு அணியும் தலா மூன்று ஆட்டங்களில் விளையாடும். நான்கு அணிகளில் முதலில் வரும் அணி - இந்தியா, பாகிஸ்தான் இடம்பெற்றுள்ள குரூப் ஏ பிரிவில் இடம்பிடிக்கும்.

இதுவரை எல்லா அணிகளும் தலா 2 ஆட்டங்களில் விளையாடியுள்ளன. 2 ஆட்டங்களிலும் வெற்றி பெற்று ஹாங்காங் முதலிடத்தில் உள்ளது. ஐக்கிய அரபு அமீரகம், குவைத் ஆகிய அணிகள் 2 புள்ளிகளுடன் அடுத்த இரு இடங்களில் உள்ளன. ஒரு வெற்றியும் பெறாத சிங்கப்பூர் கடைசி இடத்தில் உள்ளது. 

இன்று நடைபெறும் ஆட்டங்களில் குவைத் - சிங்கப்பூர், ஹாங்காங் - ஐக்கிய அரபு அமீரகம் ஆகிய அணிகள் மோதுகின்றன. 

ஹாங்காங் அணி இன்றைய ஆட்டத்தில் வெற்றி பெற்றால் அந்த அணி தான் பிரதான போட்டியில் விளையாடும் தகுதியைப் பெறும். ஐக்கிய அரபு அமீரகத்தின் நெட் ரன்ரேட் (1.045), ஹாங்காங்கை விடவும் (0.716) நல்ல நிலைமையில் உள்ளது. எனவே இன்றைய ஆட்டத்தில் ஐக்கிய அரபு அமீரகம் வெற்றி பெற்றால் அந்த அணியே தகுதி பெறும். சர்வதேச டி20 ஆட்டத்தில் இதுவரை ஹாங்காங், ஐக்கிய அரபு அமீரகத்தைத் தோற்கடித்ததில்லை. 

குவைத் அணி 2 புள்ளிகளுடன் உள்ளது (நெட் ரன்ரேட் -0.421). இந்த அணி தகுதி பெற வேண்டும் என்றால் முதலில் ஹாங்காங் தோற்க வேண்டும். பிறகு ஐக்கிய அரபு அமீரகத்தைத் தாண்டிச் செல்ல வேண்டும் என்றால் குறைந்தபட்சம் 78 ரன்கள் வித்தியாசத்தில் சிங்கப்பூரை ஜெயிக்க வேண்டும். அல்லது 11 ஓவர்களில் இலக்கை விரட்ட வேண்டும். குவைத்தை சிங்கப்பூர் வெற்றி பெற்றுவிட்டால், ஹாங்காங் - ஐக்கிய அரபு அமீரகம் அணிகளுக்கு இடையே நடைபெறும் ஆட்டத்தில் வெல்லும் அணியே தகுதி பெறும். இதனால் இன்றைய ஆட்டங்கள் மிகவும் பரபரப்பாக இருக்கும் என எதிர்பார்க்கப்படுகிறது.