குகேஷைப் பின்னுக்குத் தள்ளி இந்தியாவின் நெ.2 செஸ் வீரராக முன்னேறிய அர்ஜுன்

துபை ஓபன் செஸ் போட்டியில் சிறப்பாக விளையாடி வரும் அர்ஜுன் எரிகைசி, இந்தியாவின் நெ.2 செஸ் வீரராக முன்னேறியுள்ளார்.

அபுதாபி மாஸ்டர்ஸ் செஸ் போட்டியை இந்தியாவின் 18 வயது அர்ஜூன் எரிகைசி சமீபத்தில் வென்றார்.  9 சுற்றுகளின் முடிவில் 7.5 புள்ளிகள் பெற்று முதலிடம் பெற்றார். 

இந்த வெற்றியின் மூலம் செஸ் தரவரிசையில் 2724 புள்ளிகளுடன் 24-ம் இடத்துக்கு முன்னேறினார் அர்ஜுன். இவருக்கு முன்பு விஸ்வநாதன் ஆனந்த் 2756 புள்ளிகளுடன் 12-ம் இடத்திலும் குகேஷ் 2728 புள்ளிகளுடன் 20-ம் இடத்திலும் இருந்தார்கள். 

அபுதாபி ஓபன் செஸ் போட்டிக்கு அடுத்ததாக துபை ஓபன் செஸ் போட்டியில் விளையாடி வரும் அர்ஜுன் எரிகைசி, முதல் மூன்று ஆட்டங்களிலும் வெற்றி பெற்று பிரக்ஞானந்தா உள்பட 7 வீரர்களுடன் இணைந்து முதலிடத்தில் உள்ளார். இதையடுத்து தரவரிசையில் முன்னேற்றம் அடைந்துள்ளார். 

தற்போதைய செஸ் தரவரிசையில் முதல் இடத்தில் கார்ல்சன் தொடர்ந்து நீடிக்கிறார். விஸ்வநாதன் ஆனந்த் 12-ம் இடத்தில் உள்ள நிலையில் குகேஷைப் பின்னுக்குத் தள்ளி  2728.7 புள்ளிகளுடன் 20-ம் இடத்துக்கு முன்னேறியுள்ளார் அர்ஜுன் எரிகைசி. 2725.7 புள்ளிகளுடன் குகேஷ் 24-ம் இடத்துக்கு இறங்கியுள்ளார். இதன் மூலம் இந்தியாவின் நெ.2 செஸ் வீரராக முன்னேறியுள்ளார் அர்ஜுன் எரிகைசி.