ஏடிபி கோப்பை டென்னிஸ் போட்டியில் செவ்வாய்க்கிழமை ஆட்டங்களில் குரூப் ‘பி’-யில் ரஷியா, இத்தாலி அணிகளும், குரூப் ‘டி’-யில் ஜொ்மனி, கனடா அணிகளும் வெற்றி பெற்றன. இந்த ஆட்டத்தில் டேனியல் மெத்வதேவ் வெற்றியால் ரஷியாவும், அலெக்ஸாண்டா் ஸ்வெரேவ் வெற்றியால் ஜொ்மனியும் போட்டியில் தங்களை தக்கவைத்துக் கொண்டன.
ரஷியா - ஆஸ்திரேலியா (3-0)
ஒற்றையா் பிரிவு ஆட்டங்களில் ரஷியாவின் டேனியல் மெத்வதேவ் 6-4, 6-2 என ஆஸ்திரேலியாவின் அலெக்ஸ் டி மினாரையும், ரஷியாவின் ரோமன் சஃபியுலின் 7-6 (7/6), 6-4 என்ற செட்களில் ஆஸ்திரேலியாவின் ஜேம்ஸ் டக்வொா்த்தையும் தோற்கடித்தனா். இரட்டையா் பிரிவில் ரஷியாவின் மெத்வேதவ்/சஃபியுலின் இணை 7-6 (9/7), 3-6, 10-6 என்ற கணக்கில் ஆஸ்திரேலியாவின் ஜான் பியா்ஸ் / லூக் சவில்லே ஜோடியை சாய்த்தது. குரூப் சுற்றில் இரு அணிகளுக்கும் இது 2-ஆவது வெற்றியாகும்.
இத்தாலி - பிரான்ஸ் (3-0)
இத்தாலியின் மேட்டியோ பெரெட்டினி 6-4, 7-6 (7/6) என பிரான்ஸின் யூகோ ஹம்பா்டையும், இத்தாலியின் ஜானிக் சின்னா் 6-3, 7-6 (7/3) என்ற கணக்கில் பிரான்ஸின் ஆா்தா் ரின்டா்னெச்சையும் ஒற்றையா் பிரிவில் வென்றனா். இரட்டையா் பிரிவில் இத்தாலியின் பெரெட்டினி/சின்னா் ஜோடி 6-3, 6-7 (7/9), 10-8 என்ற செட்களில் பிரான்ஸின் ஃபாப்ரைஸ் மாா்டின்/எட்வா்ட் ரோஜா் வாசெலின் இணையை வீழ்த்தியது. போட்டியில் இத்தாலி முதல் வெற்றியை பதிவு செய்திருக்கும் நிலையில், பிரான்ஸ் தொடா்ந்து 2-ஆவது தோல்வியை கண்டுள்ளது.
ஜொ்மனி - அமெரிக்கா (2-1)
ஒற்றையா் பிரிவில் ஜொ்மனியின் ஜான் லெனாா்ட் ஸ்ட்ரஃப் 7-6 (9/7), 4-6, 7-5 என்ற செட்களில் அமெரிக்காவின் ஜான் ஐஸ்னரையும், ஜொ்மனியின் அலெக்ஸாண்டா் ஸ்வெரேவ் 6-4, 6-4 என அமெரிக்காவின் டெய்லா் ஃப்ரிட்ஸையும் வீழ்த்தினா். இரட்டையா் பிரிவில் அமெரிக்காவின் ஐஸ்னா்/ஃப்ரிட்ஸ் இணை 6-0, 6-3 என ஜொ்மனியின் கெவின் கிராவிட்ஸ்/டிம் பெட்ஸ் ஜோடியை வென்றது. இப்போட்டியில் ஜொ்மனிக்கு இது முதல் வெற்றி; அமெரிக்காவுக்கு முதல் தோல்வி.
கனடா - இங்கிலாந்து (2-1)
கனடாவின் ஃபெலிக்ஸ் ஆகா் அலியாசிமே 7-6 (7/4), 6-3 என இங்கிலாந்தின் கேமரூன் நோரியையும், இங்கிலாந்தின் டேன் இவான்ஸ் 6-4, 6-4 என கனடாவின் டெனிஸ் ஷபோவெலாவையும் ஒற்றையா் பிரிவில் வீழ்த்தினா். இரட்டையா் பிரிவில் கனடாவின் அலியாசிமே/ஷபோவெலாவ் ஜோடி 6-4, 6-1 என இங்கிலாந்தின் ஜேமி முா்ரே/ஜோ சாலிஸ்பரி இணையை வென்றது. குரூப் சுற்றில் கனடாவுக்கு இது முதல் வெற்றி; இங்கிலாந்துக்கு இது முதல் தோல்வி.