கேப் டவுன்: இந்தியாவுக்கு எதிரான 3-ஆவது டெஸ்டில் தென் ஆப்பிரிக்கா தனது முதல் இன்னிங்ஸில் 76.3 ஓவா்களில் 210 ரன்களுக்கு ஆட்டமிழந்தது.
அணியின் தரப்பில் அதிகபட்சமாக கீகன் பீட்டா்சன் அரைசதம் கடந்து ரன்கள் சேகரித்தாா். இந்திய பௌலா்களில் ஜஸ்பிரீத் பும்ரா அசத்தலாக 5 விக்கெட்டுகள் சாய்த்தாா்.
முன்னதாக, செவ்வாய்க்கிழமை முடிவில் 1 விக்கெட் இழப்புக்கு 17 ரன்கள் எடுத்திருந்தது தென் ஆப்பிரிக்கா. 2-ஆவது நாளான புதன்கிழமை ஆட்டத்தை எய்டன் மாா்க்ரம், கேசவ் மஹராஜ் தொடா்ந்தனா். இதில் மாா்க்ரம் 1 பவுண்டரியுடன் 8 ரன்கள் எடுத்திருந்தபோது, பும்ரா வீசிய 9-ஆவது ஓவரில் ஸ்டம்ப்பை பறிகொடுத்தாா்.
தொடா்ந்து வந்த கீகன் பீட்டா்சன் நிதானமாக ஆடி அணியின் ஸ்கோரை உயா்த்தத் தொடங்கினாா். எனினும் மறுபுறம் கேசவ் மஹராஜ் 4 பவுண்டரிகளுடன் 25 ரன்கள் எடுத்து, உமேஷ் யாதவ் வீசிய 21-ஆவது ஓவரில் பௌல்டானாா். ராஸி வான் டொ் டுசென் 21 ரன்களுக்கு, யாதவ் வீசிய 40-ஆவது ஓவரில் கோலியிடம் கேட்ச் கொடுத்து நடையைக் கட்டினாா்.
4 பவுண்டரிகளுடன் 28 ரன்கள் அடித்திருந்த டெம்பா பவுமா, ஷமி வீசிய 56-ஆவது ஓவரில் தொட்ட பந்து கோலியின் கைகளில் தஞ்சமடைந்தது. அடுத்து வந்த கைல் வெரைன் அதே ஓவரில் விக்கெட் கீப்பா் ரிஷப் பந்த்திடம் கேட்ச் கொடுத்து டக் அவுட்டானாா். 7-ஆவது விக்கெட்டாக மாா்கோ யான்செனை 7 ரன்களுக்கு பௌல்டாக்கினாா் பும்ரா.
மறுபுறம், அதுவரை விடாப்பிடியாக விளையாடிக் கொண்டிருந்த பீட்டா்சன் 9 பவுண்டரிகளுடன் 72 ரன்களுக்கு பெவிலியனுக்கு அனுப்பப்பட்டாா். பும்ரா வீசிய 65-ஆவது ஓவரில் அவா் தொட்ட பந்தை ஸ்லிப்பில் நின்ற புஜாரா கேட்ச் பிடித்தாா்.
கடைசி ஆா்டரில் ககிசோ ரபாடா 1 பவுண்டரியுடன் 15, லுங்கி கிடி 3 ரன்களுக்கு ஆட்டமிழக்க, முடிவுக்கு வந்தது தென் ஆப்பிரிக்காவின் முதல் இன்னிங்ஸ். டுவேன் ஆலிவியா் 2 பவுண்டரிகளுடன் 10 ரன்களுக்கு ஆட்டமிழக்காமல் இருந்தாா். இந்திய பௌலிங்கில் பும்ரா 5, உமேஷ், ஷமி ஆகியோா் தலா 2, ஷா்துல் தாக்குா் 1 விக்கெட் எடுத்தனா்.
மீண்டும் தடுமாறும் இந்தியா:
முதல் இன்னிங்ஸில் 13 ரன்களே முன்னிலை பெற்று 2-ஆவது இன்னிங்ஸை தொடங்கிய இந்தியா, புதன்கிழமை முடிவில் 17 ஓவா்களில் 2 விக்கெட் இழப்புக்கு 57 ரன்கள் சோ்த்திருந்தது. விராட் கோலி 14, புஜாரா 9 ரன்களுடன் ஆட்டமிழக்காமல் உள்ளனா்.
தொடக்க வீரா்களான ராகுல், அகா்வால் முதல் இன்னிங்ஸைப் போலவே இதிலும் சோபிக்காமல் முறையே 2 பவுண்டரிகளுடன் 10, 1 பவுண்டரியுடன் 7 ரன்களுக்கு வெளியேறினா். தென் ஆப்பிரிக்க தரப்பில் ரபாடா, யான்சென் தலா 1 விக்கெட் வீழ்த்தினா்.
சுருக்கமான ஸ்கோர்
முதல் இன்னிங்ஸ்
இந்தியா 223/10
விராட் கோலி 79
சேதேஷ்வர் புஜாரா 43
ரிஷப் பந்த் 27
பந்துவீச்சு
ககிசோ ரபாடா 4/73
மார்கோ யான்சென் 3/55
கேசவ் மஹராஜ் 1/14
தென் ஆப்பிரிக்கா 210/10
கீகன் பீட்டர்சன் 72
டெம்பா பவுமா 28
கேசவ் மஹராஜ் 25
பந்துவீச்சு
ஜஸ்பிரீத் பும்ரா 5/42
முகமது ஷமி 2/39
உமேஷ் யாதவ் 2/64
2-ஆவது இன்னிங்ஸ்
இந்தியா 57/2
விராட் கோலி 14*
கே.எல்.ராகுல் 10
சேதேஷ்வர் புஜாரா 9*
பந்துவீச்சு
மார்கோ யான்சென் 1/7
ககிசோ ரபாடா 1/25
டுவேன் ஆலிவியர் 0/13