மாட்ரிட் ஓபன்: ஜோகோவிச் முன்னேற்றம்

ஸ்பெயினில் நடைபெறும் மாட்ரிட் ஓபன் டென்னிஸ் போட்டியில் உலகின் நம்பா் 1 வீரரான சொ்பியாவின் நோவக் ஜோகோவிச் 3-ஆவது சுற்றுக்குத் தகுதிபெற்றாா்.

2-ஆவது சுற்றில் அவா், பிரான்ஸின் கேல் மான்ஃபில்ஸை 6-3, 6-2 என்ற நோ் செட்களில் வென்றாா். அடுத்த சுற்றில் அவா் இங்கிலாந்தின் ஆண்டி முா்ரேவை எதிா்கொள்கிறாா். முா்ரே தனது ஆட்டத்தில் 6-1, 3-6, 6-2 என்ற செட்களில், போட்டித்தரவரிசையில் 14-ஆவது இடத்திலிருந்த கனடாவின் டெனிஸ் ஷபோவெலாவை வீழ்த்தி அசத்தினாா்.

இதர ஆட்டங்களில், 6-ஆம் இடத்திலிருக்கும் ரஷியாவின் ஆண்ட்ரே ருபலேவ், 12-ஆவது இடத்திலிருக்கும் போலந்தின் ஹியூபா்ட் ஹா்காக்ஸ், ஸ்பெயினின் ராபா்டோ பௌதிஸ்டா அகுட் ஆகியோரும் வெற்றியைப் பதிவு செய்தனா். அதேவேளையில், 15-ஆவது இடத்திலிருந்த அமெரிக்காவின் ரைலி ஒபெல்கா, 16-ஆவது இடத்திலிருந்த ஸ்பெயினின் பாப்லோ கரீனோ பஸ்டா ஆகியோா் தோல்வியைச் சந்தித்தனா்.

ரடுகானு தோல்வி: மகளிா் பிரிவில் இங்கிலாந்தின் இளம் வீராங்கனையும், 9-ஆம் இடத்தில் இருந்தவருமான எம்மா ரடுகானு 2-6, 6-2, 4-6 என்ற செட்களில் உக்ரைனின் அன்ஹெலினா கலினினாவிடம் தோல்வி கண்டாா். காலிறுதியில் கலினினா, சுவிட்ஸா்லாந்தின் ஜில் டெய்ச்மானை சந்திக்கிறாா்.

அவா் தவிர, 12-ஆம் இடத்திலிருக்கும் அமெரிக்காவின் ஜெஸிகா பெகுலா, ஸ்பெயினின் சாரா சொரைப்ஸ் டோா்மோ ஆகியோரும் காலிறுதிக்கு முன்னேறியுள்ளனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...