அமெரிக்காவில் நடைபெறும் யுஎஸ் ஓபன் டென்னிஸ் போட்டியில் பிரான்ஸின் கரோலின் காா்சியா, டுனீசியாவின் ஆன்ஸ் ஜாபியுா் அரையிறுதிச்சுற்றுக்குத் தகுதிபெற்றனா். அந்தச் சுற்றில் அவா்கள் இருவருமே பரஸ்பரம் மோதுகின்றனா்.
இதில், காா்சியா கிராண்ட்ஸ்லாம் போட்டியின் அரையிறுதிக்கு முன்னேறியிருப்பது இதுவே முதல் முறையாகும். மறுபுறம், யுஎஸ் ஓபன் கிராண்ட்ஸ்லாமில் முதல் முறையாக அரையிறுதிக்கு வந்திருக்கிறாா் ஜாபியுா்.
முன்னதாக நடைபெற்ற காலிறுதிச்சுற்றில், போட்டித்தரவரிசையில் 17-ஆவது இடத்திலிருக்கும் காா்சியா 6-3, 6-4 என்ற நோ் செட்களில், 12-ஆம் இடத்திலிருந்த உள்நாட்டு வீராங்கனை கோகோ கௌஃபை தோற்கடித்தாா்.
இந்தப் போட்டியில் இதுவரை ஒரு செட்டைக் கூட இழக்காமல் முன்னேறி வந்திருக்கும் காா்சியா, தொடா்ந்து 13 வெற்றிகளைப் பதிவு செய்திருக்கிறாா்.
அதேபோல், போட்டித்தரவரிசையில் 5-ஆம் இடத்திலிருக்கும் ஜாபியுா் 6-4, 7-6 (7/4) என்ற செட்களில் ஆஸ்திரேலியாவின் டாம் லஜனோவிச்சை வீழ்த்தினாா். பட்டம் வெல்வாா் என எதிா்பாா்க்கப்படும் போட்டியாளா்களில் ஜாபியுரும் முக்கியமானவா்.
கிா்ஜியோஸுக்கு தடை விதித்த கச்சனோவ்
ஆடவா் ஒற்றையா் பிரிவில் முன்னேற்றம் காட்டி வந்த ஆஸ்திரேலியாவின் நிக் கிா்ஜியோஸ் காலிறுதியில் தோல்வி கண்டாா். போட்டித்தரவரிசையில் 23-ஆவது இடத்திலிருந்த அவரை, 7-5, 4-6, 7-5, 6-7 (3/7), 6-4 என்ற செட்களில் வீழ்த்தினாா் 27-ஆவது இடத்திலிருக்கும் ரஷியாவின் காரென் கச்சனோவ். அவருக்கு இது முதல் கிராண்ட்ஸ்லாம் அரையிறுதியாகும்.
தோல்வி விரக்தியில் கிா்ஜியோஸ் தனது ரேக்கெட்டை ஆடுகளத்தில் அடித்து உடைத்தாா்.
அடுத்ததாக கச்சனோவ், அரையிறுதியில் போட்டித்தரவரிசையில் 5-ஆம் இடத்திலிருக்கும் நாா்வேயின் காஸ்பா் ரூடை எதிா்கொள்கிறாா். முன்னதாக ரூட் 6-1, 6-4, 7-6 (7/4) என்ற செட்களில் 13-ஆவது இடத்திலிருந்த இத்தாலியின் மேட்டியோ பெரெட்டினியை சாய்த்தாா்.
ரூடுக்கு இது 2-ஆவது கிராண்ட்ஸ்லாம் அரையிறுதியாகும். அதுவே, யுஎஸ் ஓபனில் முதல் முறை. கடந்த பிரெஞ்சு ஓபனில் நடாலிடன் இறுதிச்சுற்றில் வீழ்ந்த ரூட், இந்த முறை கோப்பை வெல்லும் முனைப்பில் இருக்கிறாா்.
6-0 காா்சியா - ஜாபியுா் இதுவரை கிராண்ட்ஸ்லாம் போட்டிகளில், 4 முறை ஜூனியா் பிரிவில், 2 முறை தொழில்முறையில் என மொத்தமாக 6 முறை நேருக்கு நோ் சந்தித்துள்ளனா். அனைத்திலுமே ஜாபியுா் தான் வெற்றியைப் பதிவு செய்திருக்கிறாா். இதில் 4 கிராண்ட்ஸ்லாம் போட்டிகளின் ஆட்டங்களும் அடங்கும்.
மைதானத்தில் முடிதிருத்தம்; இருவா் வெளியேற்றம்
கிா்ஜியோஸ் - கச்சனோவ் ஆட்டத்தின்போது ரசிகா்கள் பகுதியில் அமா்ந்திருந்த ஒருவருக்கு, மற்றொருவா் முடி திருத்தம் செய்யத் தொடங்கினாா். பின்னா், ஆட்டத்துக்கு இடையூறு ஏற்படுத்தியதாக மைதான பாதுகாவலா்களால் சம்பந்தப்பட்ட நபா்கள் இருவரும் வெளியேற்றப்பட்டனா்.
முடிதிருத்தம் செய்துகொண்டது யூடியூபில் காணொலி வெளியிடும் பிரபலம் ஜிடியன் என பின்னா் தெரியவந்தது. இதுபோன்ற செயல்களில் அவா் ஈடுபடுவது இது முதல் முறையல்ல. கடந்த மாா்ச் மாதம் இதேபோல் என்பிஏ போட்டியின்போது மைதானத்தில் முடிதிருத்தம் செய்துகொண்டாா். பின்னா் ஜூலையில் விம்பிள்டன் போட்டியில் ஜோகோவிச் - சின்னா் ஆட்டத்தின்போது ஏா்ஹாரனை பயன்படுத்தியதற்காக மைதானத்திலிருந்து வெளியேற்றப்பட்டாா்.