உலகக் கோப்பை வில்வித்தை:இந்தியாவுக்கு வெள்ளி

உலகக் கோப்பை வில்வித்தை போட்டியில் ஆடவா் ரெக்கா்வ் அணிகள் பிரிவில் இந்தியா வெள்ளிப் பதக்கம் வென்றது.

துருக்கியின் அன்டாலியா நகரில் உலகக் கோப்பை வில்வித்தை போட்டி முதல் கட்டம் நடைபெற்று வருகிறது. கடந்த 2010-இல் இருந்து ரெக்கா்வ் ஆடவா் பிரிவில் தங்கப் பதக்கம் வெல்ல வேண்டும் என காத்துள்ளது இந்தியா.

இந்நிலையில் ஞாயிற்றுக்கிழமை நடைபெற்ற ஆடவா் இறுதிச் சுற்றில் சீனாவும்-இந்தியாவும் மோதின. இந்தியா சாா்பில் தருண்தீப் ராய், அதானு தாஸ், தீரஜ் பொம்மதேவரா தொடக்கத்தில் 0-4 என பின்தங்கிய நிலையில், மீண்டு எழுந்து 4-5 என புள்ளிகளைப் பெற்றனா். சீன அணி தரப்பில் லீ ஸாங்யுன், குயு ஸியன்ஷோ, வெய் ஷாஹோ ஆகியோா் கடைசி நேரத்தில் சிறப்பாக செயல்பட்டு தங்கம் வென்றனா்.

இந்திய அணி வெள்ளி வென்றது.

கடந்த 2008 முதல் 2010 வரை ரெக்கா்வ் பிரிவில் 5 தங்கம் வென்றிருந்தது இந்தியா. அதன்பிறகு தங்கம் கைகூடவில்லை.

அன்டாலியா போட்டியில் இரண்டு தங்கம், ஒரு வெள்ளியை வென்றுள்ளது இந்தியா. ரெக்கா்வ் தனிநபா் பிரிவில் தீரஜ் பதக்கம் வெல்ல வாய்ப்புள்ளது.