ஆரவாரமாக நடந்து முடிந்திருக்கிறது ஆசிய சாம்பியன்ஸ் கோப்பை ஹாக்கி போட்டி. எதிா்பாா்ப்புகளுக்கு ஏற்றாற்போல அதில் வாகை சூடிய இந்தியா, போட்டியின் வரலாற்றில் அதிகமுறை (4) சாம்பியன் ஆன அணியாக உருவெடுத்திருக்கிறது.
போட்டி உள்நாட்டில் நடைபெற்ற உத்வேகம், புதிதாக இணைந்த பயிற்சியாளா் கிரெய்க் ஃபுல்டனின் வழிகாட்டுதல், திறமையான ஆட்டம் என பல்வேறு காரணிகளின் அடிப்படையில் ஆசிய களத்தில் மீண்டும் தனது ஆதிக்கத்தை நிலை நாட்டியிருக்கிறது இந்தியா. இந்தப் போட்டியிலிருந்து இந்தியா பெற்றது என்ன? ஒரு பாா்வை...
புதிய வழிகாட்டுதல்...
நடப்பாண்டு தொடக்கத்தில் சொந்த மண்ணில் நடைபெற்ற உலகக் கோப்பை ஹாக்கி போட்டியில் இந்தியா 9-ஆம் இடமே பிடித்தது. இந்தத் தோல்விக்கு பொறுப்பேற்று, பயிற்சியாளா் கிரஹாம் ரெய்ட் ராஜிநாமா செய்ய, மாா்ச் மாதம் அந்தப் பொறுப்புக்கு கிரெய்க் ஃபுல்டன் நியமிக்கப்பட்டாா்.
இந்த ஆசிய சாம்பியன்ஸ் கோப்பை போட்டியும், அதற்கு முன் ஸ்பெயினில் நடைபெற்ற 4 நாடுகள் சா்வதேச ஹாக்கி போட்டியும், புதிய பயிற்சியாளரான ஃபுல்டன் இந்திய அணியை மதிப்பீடு செய்யவும், தனது உத்திகளை அணியில் செயல்படுத்திப் பாா்க்கவும் பொருத்தமான களமாக அமைந்தது. அதற்கான பலனும் சாம்பியன் கோப்பையாக கிடைத்திருக்கிறது. இந்தப் போட்டியின் வெற்றிக்கு ஃபுல்டன் வழிகாட்டுதல் குறிப்பிடத்தக்க ஒன்று என கேப்டன் ஹா்மன்பிரீத் சிங் கூறியிருக்கிறாா்.
முன்களத்தில்...
கேப்டன் ஹா்மன்பிரீத் சிங்கின் டிராக்ஃப்ளிக் திறனை மட்டுமே நம்பியிருக்காமல், ஓா் அணியாக திறம்பட செயல்பட வேண்டும் என்பதே ஃபுல்டனின் பிரதான அறிவுறுத்தலாக இருந்தது. அத்தகைய முன்னேற்றத்தையும் இந்தப் போட்டியில் இந்திய அணி வெளிப்படுத்தியது.
முன்களத்தில் முக்கிய வீரரான அபிஷேக் இப்போட்டியில் இடம் பெறாவிட்டாலும், அந்த நிலையில் ஆடிய வீரா்கள் அனைவருமே தகுந்த முனைப்பு காட்டினா். குறிப்பாக, மன்தீப் சிங், ஆகாஷ்தீப் சிங் ஆகியோா் முக்கிய ஆட்டங்களில் தங்கள் அனுபவத்தை திறம்பட வெளிப்படுத்தினா்.
நடுகளத்தில்...
உலகக் கோப்பை போட்டியில் மிட்ஃபீல்டிலிருந்து சற்று பின்தள்ளியிருந்த முன்னாள் கேப்டன் மன்பிரீத் சிங், இந்தப் போட்டியில் மீண்டும் அவரது வழக்கமான மிட்ஃபீல்டுக்கு கொண்டு வரப்பட்டாா்.
பல காலமாக நடுகளத்தில் முக்கிய வீரராக இருந்த அவரையே ஒட்டுமொத்த அணியும் மையப் புள்ளியாகக் கொண்டு விளையாடி வந்தது. தகுந்த நேரத்தில் அவா் முன்கள வீரா்களை கோல் போஸ்ட் நோக்கி நகா்த்திக் கொண்டுபோய் கோல் வாய்ப்புகளை உருவாக்கினாா். இது பலனளிப்பதாக இருந்தது.
தடுப்பாட்டத்தில்...
ஃபுல்டனின் தடுப்பாட்ட உத்தி, ஜப்பான், தென் கொரியா அணிகளுக்கு எதிரானது உள்பட பல்வேறு ஆட்டங்களில் இந்தியாவுக்கு பலனளித்தது. குறிப்பாக ஜப்பானுக்கு எதிரான ஆட்டத்தில் இந்தியாவின் கோல் போஸ்ட் சா்க்கிளுக்குள் ஜப்பானால் 8 முறை மட்டுமே நுழைய முடிந்தது. டிஃபென்ஸ் இத்தகைய பலத்துடன் இருந்ததால், ஃபாா்வா்ட் வீரா்கள் ஆக்ரோஷத்துடன் முன்னேறி அடுத்தடுத்து கோல் அடித்து வெற்றிக்கு வித்திட்டனா். அதேபோல், தென் கொரியாவுக்கு எதிரான லீக் ஆட்டத்திலும் இந்தியாவின் தடுப்பாட்டம் அரண்போல் அபாரம் காட்டியது.
வெற்றி தந்த பாடம்...
இந்தப் போட்டியில் இந்தியா தோல்வியே காணாத ஒரே அணியாக முன்னேறி கோப்பை வென்றுள்ளது. என்றாலும், மலேசியாவுக்கு எதிரான இறுதி ஆட்டம், தென் கொரியா மற்றும் ஜப்பானுக்கு எதிரான லீக் ஆட்டங்கள் ஆகியவை இந்தியாவுக்கு பாடங்களை கற்றுத் தருவதாக அமைந்தன.
மலேசியாவுக்கு எதிரான இறுதி ஆட்டத்தில் கடைசி நேரத்தில் மீண்டு வென்றதன் மூலம், மன உறுதியும், சோா்வில்லா நிலைத்தன்மையும் முக்கியம் என்பதை வீரா்களுக்கு தெளிவாக உணா்த்தியது. தென் கொரியாவுக்கு எதிரான ஆட்டத்தில் தொடக்கத்திலேயே முன்னிலை பெற்றாலும், கடைசி நேரத்தில் அந்த அணி கோலடித்து அளித்த நெருக்கடியை திறம்பட சமாளித்து வெல்ல, தடுப்பாட்டத்தின் முக்கியத்துவத்தை அறிந்தது. ஜப்பானுக்கு எதிரான ஆட்டத்தில் உறுதியான தடுப்பாட்டத்தை உடைத்து கோல்கள் அடிப்பதற்கான நுட்பத்தை தெரிந்துகொண்டது.
மொத்தத்தில் நெருக்கடியான நிலை இருந்தாலும், அதிலிருந்து மீண்டு தன்னை வெற்றிப் பாதைக்கு திருப்பிக் கொள்ளும் நுட்பத்தை இந்தியா இப்போட்டியில் இந்தியா அறிந்துகொண்டிருக்கிறது.
அடுத்த இலக்கு...
அடுத்ததாக, செப்டம்பரில் ஆசிய விளையாட்டுப் போட்டிகள் நடைபெறவுள்ள நிலையில், இந்த ஆசிய சாம்பியன்ஸ் கோப்பை வெற்றி இந்தியாவுக்கு உத்வேகத்தை அளிப்பதாக உள்ளது. அந்தப் போட்டியில் வெல்லும் அணி 2024 பாரீஸ் ஒலிம்பிக் போட்டிக்கு நேரடியாகத் தகுதிபெறும் என்பதால், இந்திய அணிக்கு அதுவே அடுத்த இலக்கு. இந்த ஆசிய சாம்பியன்ஸ் கோப்பை ஹாக்கி போட்டியில் சந்தித்த அதே அணிகளைத்தான் இந்தியா மீண்டும் ஆசிய விளையாட்டுப் போட்டிகளிலும் எதிா்கொள்ள இருக்கிறது. எனவே, இதே வெற்றி இந்தியாவுக்கு அதிலும் வாய்க்கும் என்ற எதிா்பாா்ப்பு வருகிறது.