நியூசிலாந்து - வங்கதேசம் 2-வது டெஸ்ட்: மழையால் பாதித்த இரண்டாம் நாள் ஆட்டம்!

வங்கதேசம் மற்றும் நியூசிலாந்து அணிகளுக்கு இடையேயான 2-வது டெஸ்ட் போட்டியின் இரண்டாம் நாள் ஆட்டம் மழையின் காரணமாக பந்துகள் வீசாமலேயே நிறைவடைந்தது.

நியூசிலாந்து அணி வங்கதேசத்தில் சுற்றுப்பயணம் மேற்கொண்டு 2 போட்டிகள் கொண்ட டெஸ்ட் தொடரில் விளையாடி வருகிறது. இரு அணிகளுக்கும் இடையிலான முதல் டெஸ்ட் போட்டியில் வங்கதேசம் 150 ரன்கள் வித்தியாசத்தில் வெற்றி பெற்றதைத் தொடர்ந்து, நேற்று (டிசம்பர் 6) இரு அணிகளுக்கும் இடையிலான 2-வது டெஸ்ட் போட்டி தொடங்கியது. போட்டியின் முதல் நாளான நேற்று முதல் இன்னிங்ஸில் பேட் செய்த வங்கதேசம் 172 ரன்களுக்கு ஆட்டமிழந்தது. அந்த அணியில் அதிகபட்சமாக முஸ்தபிசூர் ரஹீம் 35 ரன்கள் எடுத்தார்.

இதையும்  படிக்க: அவர் என்னை என்ன கூறினார் தெரியுமா? கௌதம் கம்பீர் மீது முன்னாள் இந்திய வீரர் குற்றச்சாட்டு!

கிளன் பிளிப்ஸ் மற்றும் மிட்செல் சாண்ட்னர் தலா 3 விக்கெட்டுகளைக் கைப்பற்றினர். அஜாஸ் படேல் 2 விக்கெட்டுகளையும், டிம் சௌதி ஒரு விக்கெட்டினையும் கைப்பற்றினர். இதனையடுத்து, நியூசிலாந்து அணி தனது முதல் இன்னிங்ஸைத் தொடங்கியது. முதல் நாள் ஆட்டநேர முடிவில் நியூசிலாந்து அணி 55 ரன்களுக்கு 5  விக்கெட்டை  இழந்திருந்தது. வங்கதேசம் தரப்பில் மெஹிதி ஹாசன் 3 விக்கெட்டுகளையும், தைஜுல் இஸ்லாம் 2 விக்கெட்டுகளையும் கைப்பற்றினர். 

இந்த நிலையில், இன்று இரண்டாம் நாள் ஆட்டம் தொடங்குவதாக இருந்தது. மழை காரணமாக போட்டித் தொடங்குவதில் தாமதம் ஏற்பட்டது. நீண்ட நேரம் ஆகியும் மழை நிற்காததால் இரண்டாம் நாள் ஆட்டம் பந்துகள் வீசப்படமாலேயே நிறைவு பெற்றது. 

இதையும் படிக்க: சிறப்பான ஆட்டத்தை வெளிப்படுத்துவதற்கான நேரம் வந்துவிட்டது: ஜோஸ் பட்லர்

நியூசிலாந்தைக் காட்டிலும் 117 ரன்கள் முன்னிலையில் உள்ள வங்கதேசம் நியூசிலாந்துக்கு எதிராக முதல் முறையாக டெஸ்ட் தொடரைக் கைப்பற்றும் முனைப்பில் உள்ளது குறிப்பிடத்தக்கது.