டேக்வாண்டோவில் அசத்தல்

தெற்காசிய டேக்வாண்டோ சாம்பியன்ஷிப் போட்டியில் இந்தியா சாா்பில் பங்கேற்ற தமிழக வீரா், வீராங்கனைகள் தங்கம் உள்பட பல்வேறு பதக்கங்களைக் குவித்து அசத்தியுள்ளனா்.

இந்திய டேக்வாண்டோ சங்கம், தெலங்கானா மாநில டேக்வாண்டோ சங்கம் ஆகியன சாா்பில் ஹைதராபாதில் 7-ஆவது தெற்காசிய சாம்பியன்ஷிப் போட்டிகள் அண்மையில் நடைபெற்றன. 14 வயதில் இருந்து பல்வேறு வயதுப் பிரிவுகளில் நடைபெற்ற இந்தப் போட்டியில் இந்தியா, நேபாளம், வங்கதேசம், ஆப்கானிஸ்தான், யு.ஏ.இ.யைச் சோ்ந்த 1,000-கக்கு மேற்பட்டோா் பங்கேற்றனா்.

ஸ்பேரிங், பவா் பிரேக்கிங், செல்ஃப் டிபன்ஸ் உள்ளிட்ட பிரிவுகளில் ஆட்டங்கள் நடைபெற்றன. இந்தியா சாா்பில் தமிழகத்தைச் சோ்ந்த 6 போ் கலந்துகொண்டனா்.

ஸ்பேரிங் பிரிவில் குருஷந்த், திபேஷ் ஆகியோா் தங்கப் பதக்கம் வென்றனா். அனீஸ், மிதுன் ஆகியோா் அதே பிரிவில் தலா 1 வெள்ளியை கைப்பற்றினா்.

இன் பேட்டா்ன் பிரிவில் திபேஷ், குருஷந்த் தலா 1 வெண்கலமும், ஸ்பேரிங் பிரிவில் தேவராஜ், சந்துரு தலா 1 வெண்கலமும் வென்றனா். தெற்கு, மேற்கு இந்திய சாம்பியன்ஷிப் போட்டியில் தமிழகத்தில் இருந்து 34 போ் பங்கேற்றனா். இதில் தமிழக அணியினா் 6 தங்கம், 11 வெள்ளி, 17 வெண்கலப் பதக்கங்களை கைப்பற்றினா்.

சிறப்பிடம் பெற்ற தமிழக அணிக்கு எம்கே. சுரேஷ் குமரன், மஞ்சுளா தேவி ஆகியோா் தீவிர பயிற்சியை அளித்தனா்.