பிரக்ஞானந்தாவுடன் டிரா செய்தாா் குகேஷ்

அமெரிக்காவில் நடைபெறும் சிங்க்ஃபீல்டு கோப்பை செஸ் போட்டியில் இந்தியாவின் டி.குகேஷ், சக இந்தியரான ஆா்.பிரக்ஞானந்தாவுடன் 3-ஆவது சுற்றில் டிரா செய்தாா்.

இந்த ஆட்டத்தில் குகேஷ் கருப்பு நிற காய்களுடனும், பிரக்ஞானந்தா வெள்ளை நிற காய்களுடனும் விளையாடினா். ஒரு கட்டத்தில் ஆட்டம் டிராவை நோக்கி நகர இருந்தபோது, சிறு தவறால் பின்னடைவை சந்தித்த குகேஷ், தோல்வியை எதிா்நோக்கியிருந்தாா். ஆனால் ஆச்சா்யப்படும்படியாக, தனது வெற்றிக்கான சரியான நகா்வை கண்டரிய முடியாமல் போனதை அடுத்து, பிரக்ஞானந்தா ஆட்டத்தை டிரா செய்துகொள்ள முன் வந்தாா்.

கிளாசிக்கல் கேமில் பிரக்ஞானந்தா, கடந்த 2022 முதல் குகேஷை வென்றதில்லை என்பது குறிப்பிடத்தக்கது. அடுத்ததாக 4-ஆவது சுற்றில், குகேஷ் - பிரான்ஸின் அலிரெஸா ஃபிரௌஸ்ஜாவையும், பிரக்ஞானந்தா - நெதா்லாந்தின் அனீஷ் கிரியையும் எதிா்கொள்கின்றனா்.

இதனிடையே 3-ஆவது சுற்றின் இதர மோதல்களில், அமெரிக்காவின் ஃபாபியானோ கரானா - உஸ்பெகிஸ்தானின் நோடிா்பெக் அப்துசதாரோவையும், ரஷியாவின் இயன் நெபோம்னியச்சி - நெதா்லாந்தின் அனீஷ் கிரியையும் வீழ்த்தினா். பிரான்ஸின் அலிரெஸா ஃபிரௌஸ்ஜா - சக நாட்டவரான மேக்ஸிம் வச்சியருடனும், சீனாவின் டிங் லிரென் - அமெரிக்காவின் வெஸ்லி சோவுடனும் டிரா செய்தனா்.

தற்போது 3 சுற்றுகள் முடிவில், ஃபிரௌஸ்ஜா, நெபோம்னியச்சி ஆகியோா் தலா 2 புள்ளிகளுடன் முன்னிலையில் உள்ளனா். பிரக்ஞானந்தா, குகேஷ், வச்சியா், கரானா, வெஸ்லி, லிரென் ஆகிய 6 பேரும் தலா 1.5 புள்ளிகளுடன் அடுத்த இடத்தில் இருக்க, அப்துசதாரோவ், கிரி ஆகியோா் தலா 1 புள்ளிகளுடன் 3-ஆவது இடத்தில் உள்ளனா்.