3 ஒருநாள், 3 டி20 ஆட்டங்களில் இலங்கையுடன் மோதும் இந்தியா

இலங்கை அணியுடன் தலா 3 ஆட்டங்கள் கொண்ட ஒருநாள் தொடா் மற்றும் டி20 தொடரில் விளையாடுவதற்காக இந்திய கிரிக்கெட் அணி, இம்மாதம் அந்நாட்டுக்குச் செல்கிறது.

பிசிசிஐ வெளியிட்ட தகவல்படி, இரு அணிகளும் முதலில் டி20 தொடரில் மோத, ஜூலை 26, 27, 29 ஆகிய தேதிகளில் பல்லெகெலெவில் அந்த ஆட்டங்கள் நடைபெறவுள்ளன. பின்னா் ஒருநாள் ஆட்டங்கள் ஆகஸ்ட் 1, 4, 7 ஆகிய தேதிகளில் கொழும்பில் விளையாடப்படவுள்ளன.

இந்தத் தொடரே, இந்தியாவின் புதிய தலைமைப் பயிற்சியாளராகப் பொறுப்பேற்றுள்ள கௌதம் கம்பீருக்கு முதல் பணியாகும். அதேபோல், இலங்கையின் இடைக்கால பயிற்சியாளராக நியமிக்கப்பட்டுள்ள சனத் ஜெயசூா்யாவுக்கும் இதுவே முதல் தொடா் என்பது குறிப்பிடத்தக்கது.

இந்தத் தொடருக்கான இந்திய அணிகள் இன்னும் அறிவிக்கப்படவில்லை. கடைசியாக இந்தியா 2021-இல் இலங்கைக்கு விளையாடச் சென்றிருந்த இந்தியா, டி20 மற்றும் ஒருநாள் என இரு தொடா்களையும் வென்றது.

ஹசரங்கா ராஜிநாமா: இந்தியாவுக்கு எதிரான தொடரில் களம் காணவுள்ள நிலையில், இலங்கை டி20 அணியின் கேப்டன் வனிந்து ஹசரங்கா ராஜிநாமா செய்துள்ளாா்.

அதை இலங்கை கிரிக்கெட் வாரியம் ஏற்றுக்கொண்டுள்ள நிலையில், புதிய கேப்டன் அறிவிக்கப்பட வேண்டியுள்ளது. ஹசரங்கா தலைமையில் சமீபத்திய டி20 உலகக் கோப்பையில் சூப்பா் 8 சுற்றுக்கு முன்னேறாமலேயே இலங்கை வெளியேறியது.