கேப்டன் பதவியிலிருந்து விலகுவது குறித்து ஆஸ்திரேலிய அணியின் கேப்டன் பாட் கம்மின்ஸ் பேசியுள்ளார்.
ஆஸ்திரேலியா மற்றும் நியூசிலாந்துக்கு இடையேயான முதல் டெஸ்ட் போட்டி இன்றுடன் நிறைவடைந்தது. இந்தப் போட்டியில் ஆஸ்திரேலிய அணி 172 ரன்கள் வித்தியாசத்தில் அபார வெற்றி பெற்றது. நேதன் லயனின் அபார பந்துவீச்சில் நியூசிலாந்து வீரர்கள் விக்கெட்டுகளை பறிகொடுத்தனர். இந்தப் போட்டியில் நேதன் லயன் 10 விக்கெட்டுகளைக் கைப்பற்றி அசத்தினார்.
இந்த நிலையில், நேதன் லயன் வருகிற 2027 ஆம் ஆண்டு வரை டெஸ்ட் போட்டிகளில் விளையாட வாய்ப்புள்ளதாக ஆஸ்திரேலிய கேப்டன் பாட் கம்மின்ஸ் தெரிவித்துள்ளது முக்கியத்துவம் பெறுகிறது.
இது தொடர்பாக அவர் பேசியதாவது: நேதன் லயன் மிகச் சிறந்த வீரர். அவர் கிரிக்கெட் விளையாடுவதற்கு தடையாக இருப்பது அவரது உடல்நலம். அவர் முழு உடற்தகுதியுடன் இருந்தால் ஆண்டுக்கு 10 டெஸ்ட் போட்டிகளில் அல்லது அதற்கு மேற்பட்ட போட்டிகளில் கண்டிப்பாக இடம்பெறுவார். அவர் வருகிற 2027 ஆம் ஆண்டு வரை டெஸ்ட் கிரிக்கெட்டில் விளையாட வேண்டும் என விரும்புகிறேன். அவர் சர்வதேசப் போட்டிகளிலிருந்து ஓய்வு பெறும்போது நான் எனது கேப்டன் பதவியிலிருந்து விலகி விடுவேன் என அவரிடம் நான் ஏற்கனவே கூறியுள்ளேன். ஏனென்றால், அது எனது வாழ்க்கையை மேலும் எளிதாக்கும் என்றார்.
