ஹாட்ரிக் வெற்றி: காலிறுதியில் இந்தியா

எஃப்ஐஎச் ஜூனியர் ஆடவர் ஹாக்கி உலகக் கோப்பை போட்டியில் சுவிட்சர்லாந்தை 5-0 என வீழ்த்தி ஹாட்ரிக் வெற்றி கண்ட இந்திய அணி காலிறுதிக்கு தகுதி பெற்றுள்ளது.

மதுரையில் செவ்வாய்க்கிழமை இரவு நடைபெற்ற ஆட்டத்தில் இந்தியா 5-0 கோல் கணக்கில் சுவிட்சர்லாந்தை வீழ்த்தியது. இத்துடன் குரூப் சுற்றின் 3 ஆட்டங்களிலுமே வெற்றி பெற்ற இந்தியா, குரூப் "பி'-யில் முதலிடம் பிடித்து காலிறுதிக்கு முன்னேறியது.

இந்த குரூப்பில் தோல்வியே சந்திக்காத ஒரே அணியாக இந்தியா 9 புள்ளிகளுடன் உள்ளது குறிப்பிடத்தக்கது. சுவிட்சர்லாந்து (6), சிலி (3), ஓமன் (0) அணிகள் முறையே 2, 3, 4-ஆம் இடங்களைப் பெற்றன.

முன்னதாக, சுவிட்சர்லாந்துக்கு எதிரான ஆட்டத்தில் இந்திய தரப்பில் மன்மீத் சிங் 2 மற்றும் 11-ஆவது நிமிஷங்களிலும், சர்தானந்த் திவாரி 13 மற்றும் 54-ஆவது நிமிஷங்களிலும் கோலடித்தனர். அர்ஷ்தீப் சிங் 28-ஆவது நிமிஷத்தில் ஒரு கோல் ஸ்கோர்

செய்தார்.

முன்னதாக, மதுரையில் நடைபெற்ற முதல் ஆட்டத்தில் ஸ்பெயின்-நமீபிய அணிகள் மோதின. இரண்டு முறை ரன்னரான ஸ்பெயினின் ஆட்டத்துக்கு நமீபிய அணியினரால் ஈடுதர முடியவில்லை.

ஸ்பெயின் அணி 13-0 எனற கோல் கணக்கில் நமீபிய அணியை வீழ்த்தியது.

ஸ்பெயின் அணியில் அவில்லா புருனோ 3 கோல்களையும், மார்ட்டின் ஜோசப் 2 கோல்களையும் அடித்தனர்.

பெல்ஜியம் அபாரம்: இரண்டாவது ஆட்டத்தில் பெல்ஜியம்-எகிப்து அணிகள் மோதின. இதில் எளிதாக 10-0 என்ற கோல் கணக்கில் பெல்ஜியம் வென்றது. பெல்ஜிய அணியில் லங்கர் மேக்ஸ்மில்லன் 2 கோல்களை அடித்தார். இதில் 4 கோல்கள் பெனால்டி கார்னர் மூலமும், 6 கோல்கள் பீல்ட் கோல்களாகும்.

நெதர்லாந்து அசத்தல் வெற்றி: மூன்றாவது ஆட்டத்தில் பலம் வாய்ந்த நெதர்லாந்தும்-ஆஸ்திரிய அணியும் மோதின. இதில் நெதர்லாந்து அணியினர் சரமாரியாக கோலடித்து 11-0 என்ற கோல் கணக்கில் வெற்றி பெற்றனர்.

நெதர்லாந்து அணியில் கேப்டன் வேன் டர் வீன் கேஸ்பர் 3 பீல்ட் கோல்களை அடித்தார். வேன் பிஜ்னென் 2 கோல்களை பதிவு செய்தார்.

இங்கிலாந்து போராடி வெற்றி: நான்காவது ஆட்டத்தில் மலேசியா-இங்கிலாந்து அணிகள் மோதின. இதில் இங்கிலாந்து அணி 3-1 என்ற கோல் கணக்கில் வென்றது.

இங்கிலாந்து தரப்பில் மர்ஹம் ஹென்றி, ராய்டன் மைக்கேல், சிஹோடோ அலெக்ஸ் ஆகியோரும், மலேசியாவின் கமரூதின் கோலடித்தனர்.

பிரான்ஸ் தொடர் வெற்றி: சென்னையில் நடைபெற்ற ஆட்டத்தில் கடந்த முறை ரன்னர் பிரான்ஸ் அணி 3-2 என்ற கோல் கணக்கில் வங்கதேச அணியை போராடி வீழ்த்தியது. பிரான்ஸ் தரப்பில் கேலியர்ட் டாம், லாராசூரி கேபின், லிடியார்ட் ஜேம்ஸ் ஆகியோரும், வங்கதேசத் தரப்பில் அப்துல்லா, அமிருல் இஸ்லாம் ஆகியோர் கோலடித்தனர்.

ஏற்கெனவே ஆஸ்திரேலிய அணிக்கு சவால் விடும் வகையில் வங்கதேச அணியினர் ஆடினர்.

சிலி முதல் வெற்றி: இரண்டாம் ஆட்டத்தில் சிலி-ஓமன் அணிகள் மோதின. இதில் சிலி அணி 2-0 என்ற கோல் கணக்கில் வென்றது.

ஆஸ்திரேலியா வெற்றி: மூன்றாவது ஆட்டத்தில் ஆஸ்திரேலியா-கொரிய அணிகள் மோதின. இதில் 3-1 என்ற கோல் கணக்கில் ஆஸ்திரேலியா வெற்றி பெற்றது.

ஆஸி. அணியில் ஜேக்ஸன் டங்கன் 17-ஆவது நிமிஷத்திலும், குரோபெல்லர் 35-ஆவது நிமிஷத்திலும், ஸ்டேங்கர் டெகின் 53=ஆவது நிமிஷத்திலும் கோலடித்தனர்.