சாம்பியன் கோப்பையை தக்கவைத்த ஸ்பெயின்

மாட்ரிட்: ஐரோப்பிய கண்டத்தில் நடைபெற்ற மகளிருக்கான நேஷன்ஸ் லீக் கால்பந்து போட்டியில் ஸ்பெயின் 2-ஆவது முறையாக கோப்பையைக் கைப்பற்றியது.

நடப்பு சாம்பியனாக களம் கண்ட அந்த அணி, இறுதி ஆட்டத்தில் 3-0 கோல் கணக்கில் ஜெர்மனியை வீழ்த்தி, கோப்பையைத் தக்கவைத்துக் கொண்டது.

முன்னதாக இந்த அணிகள் இடையேயான இறுதி ஆட்டம், இரு பகுதிகளாக (2 லெக்) நடைபெற்றது.

இதில் கடந்த நவம்பர் 28-ஆம் தேதி நடைபெற்ற முதல் லெக் ஆட்டம் கோலின்றி டிராவில் முடிந்தது.

இந்நிலையில், இந்திய நேரப்படி செவ்வாய்க்கிழமை நள்ளிரவு நடைபெற்ற 2-ஆவது லெக் ஆட்டத்தில், ஸ்பெயின் அணிக்காக கிளாடியா பினா 61-ஆவது நிமிஷத்தில் கோல் கணக்கை தொடங்கினார். விக்கி லோபஸ் 68-ஆவது நிமிஷத்தில் அதை 2-ஆக அதிகரித்தார். ஜெர்மனி தனக்கான கோல் வாய்ப்புக்காக போராடி வந்த நிலையில், கிளாடியா பினா மீண்டும் 74-ஆவது நிமிஷத்தில் ஸ்கோர் செய்தார்.

எஞ்சிய நேரத்தில் ஜெர்மனிக்கு ஏமாற்றமே மிஞ்சியது. இறுதியில் ஸ்பெயின் 3-0 கோல் கணக்கில் வென்றது. இதனால், மொத்த கோல் கணக்கு அடிப்படையில் அந்த அணி 3-0 என்ற கணக்கிலேயே வென்று சாம்பியன் ஆனது.

ஸ்பெயின் நட்சத்திர வீராங்கனை அய்டானா பொன்மட்டி காலில் எலும்பு முறிவு கண்டு இந்த ஆட்டத்தில் பங்கேற்க முடியாமல் போன நிலையில், கிளாடியா பினா அந்த இடத்தை பூர்த்தி செய்து அணிக்கு வெற்றி தேடித் தந்தார்.