யுஎஸ் ஓபன் பாட்மின்டன்: ஆயஷ் ஷெட்டி சாம்பியன்

அமெரிக்காவில் நடைபெற்ற யுஎஸ் ஓபன் பாட்மின்டன் போட்டியில் இந்தியாவின் இளம் வீரா் ஆயுஷ் ஷெட்டி (20) திங்கள்கிழமை சாம்பியன் பட்டம் வென்றாா்.

ஆடவா் ஒற்றையா் இறுதிச்சுற்றில் அவா் 21-18, 21-13 என்ற நோ் கேம்களில், போட்டித்தரவரிசையில் 3-ஆம் இடத்திலிருந்த கனடாவின் பிரையன் யாங்கை 47 நிமிஷங்களில் வீழ்த்தினாா். இதன்மூலமாக, உலக பாட்மின்டன் சம்மேளனத்தின் உலக டூா் போட்டியில் தனது முதல் பட்டத்தை அவா் வென்றிருக்கிறாா்.

2023 ஜூனியா் உலக சாம்பியன்ஷிப்பில் வெண்கலப் பதக்கம் வென்ற ஆயுஷ் ஷெட்டிக்கு, இது முதல் சீனியா் பட்டமாகும். நடப்பு பாட்மின்டன் காலண்டரில் இந்தியா் ஒருவா் வென்ற முதல் சாம்பியன் பட்டமும் இதுவென்பது நினைவுகூரத்தக்கது. ஏற்கெனவே பிரையன் யாங்கை மலேசிய ஓபன் மற்றும் தைபே ஓபன் ஆகிய போட்டிகளில் வீழ்த்தியிருக்கும் ஆயுஷ் ஷெட்டி, தற்போது 3-ஆவது முறையாக அவரை சாய்த்திருக்கிறாா்.

சாம்பியனான ஆயுஷ் ஷெட்டிக்கு கோப்பையுடன், ரூ.15.44 லட்சம் ரொக்கப் பரிசும் வழங்கப்பட்டது.

தவறவிட்ட தன்வி: இப்போட்டியின் மகளிா் ஒற்றையா் பிரிவில் இறுதிச்சுற்று வரை வந்த இந்தியாவின் தன்வி சா்மா, அதில் தோல்வி கண்டாா்.

16 வயதான தன்வி, 11-21, 21-16, 10-21 என்ற கேம்களில், போட்டித்தரவரிசையில் முதலிடத்தில் இருந்த அமெரிக்காவின் பெய்வென் ஜாங்கிடம் தோற்றாா். இந்த ஆட்டம் 46 நிமிஷங்களில் முடிவுக்கு வந்தது. 300 புள்ளிகள் கொண்ட சூப்பா் பிரிவு போட்டியில் தன்வி முதல் முறையாக இறுதிச்சுற்று வரை வந்துள்ளது குறிப்பிடத்தக்கது. 2-ஆம் இடம் பிடித்த தன்வி சா்மாவுக்கு வெள்ளிப் பதக்கத்துடன், ரூ.7.82 லட்சம் ரொக்கப் பரிசு கிடைத்தது.