2016 சட்டப்பேரவைத் தேர்தலில் தேமுதிக ஆட்சியைப் பிடிக்கும்

2016 சட்டப்பேரவைத் தேர்தலில் தேமுதிக ஆட்சியைப் பிடிக்கும் என அந்தக் கட்சியின் தலைவர் விஜயகாந்த் பேசினார்.
 தேமுதிக 11-ஆம் ஆண்டு தொடக்க விழா, மக்களுக்காக மக்கள் நலத்திட்டப் பணிகள், விஜயகாந்த் பிறந்த நாள் விழா உள்ளிட்ட முப்பெரும் விழா திங்கள்கிழமை கோவை, கொடிசியா வளாகத்தில் நடைபெற்றது.
 இதில், கட்சித் தலைவர் விஜயகாந்த் பேசியதாவது:
 பெண்களையும், தொண்டர்களையும் தான் தேமுதிக முழுமையாக நம்புகிறது.
 அவர்களது முழு ஆதரவுடன் வரும் சட்டப்பேரவைத் தேர்தலில் வெற்றி பெற்று ஆட்சி அமைப்போம்.
 அண்மையில் நடைபெற்ற உலக முதலீட்டாளர்கள் மாநாடு எவ்வித தாக்கத்தையும் ஏற்படுத்தாது. காரணம், அதன் உள்கட்டமைப்பு பணிகளை செயல்படுத்துவதற்குள் ஆட்சி முடிவடைந்துவிடும்.
 தேமுதிக கூட்டணி குறித்து சரியான நேரத்தில் முடிவு செய்யப்படும்.
 தற்போது தமிழகத்தில் நீதித்துறையும் மிகவும் மோசமடைந்து விட்டதாக நீதிபதிகளே தெரிவிக்கும் நிலை ஏற்பட்டுள்ளது.
 மதுரையில் 100 அடி உயரத்துக்கு தமிழ்த்தாய் சிலை அமைப்பது அறிவிப்புடன் நின்றுவிட்டது. கோவையில் கடந்த 2006 முதல் அவிநாசி - அத்திக்கடவு திட்டம், மோனோ ரயில் திட்டங்களும் கிடப்பில் போடப்பட்டுள்ளன. எனவே, தமிழகத்தை ஆண்ட 2 கட்சிகளும் இனி தேவையில்லை என்றார் விஜயகாந்த்.
 இதில், தேமுதிக மகளிரணித் தலைவர் பிரேமலதா விஜயகாந்த் பேசுகையில், "தென்னிந்தியாவின் மான்செஸ்டரான கோவையும், டாலர் சிட்டி என்று பெயர் பெற்ற திருப்பூரும் தற்போது மிகவும் நலிவடைந்துள்ளன.
 வரும் சட்டப்பேரவைத் தேர்தலில் தேமுதிக ஆட்சிக்கு வந்தால் ஊழலற்ற நேர்மையான ஆட்சியை வழங்கி, மக்கள் நலனில் அக்கறை செலுத்தப்படும்' என்றார்.
 இவ்விழாவில், கட்சித் தொண்டர்களுக்கு தையல் இயந்திரம், தள்ளு வண்டி, வேன், ஆட்டோ உள்ளிட்ட ரூ. 25 லட்சம் மதிப்பிலான நலத்திட்ட உதவிகள் வழங்கப்பட்டன.