அமைச்சர் ஜெயபால் பெயரில் மிரட்டல்: போலீஸார் விசாரணை

வேளாங்கண்ணியில் தொழில் அதிபர் ஒருவருக்கு அமைச்சர் ஜெயபால் பெயரில் மிரட்டல் விடுத்தது குறித்து காவல்துறையினர்  வழக்கு பதிந்து விசாரித்து வருகின்றனர்.

இதுகுறித்து போலீஸார் தரப்பில் கூறப்படுவது:

வேளாங்கண்ணி, கிழக்கு கடற்கரை சாலையில் உள்ள சந்திரா ராயல்ஸ் இன் ஹோட்டலின் உரிமையாளர் ஜெகநாதன் மகன் ஜோசப் செல்வகுமார் (38). செப்.15-ந்தேதி இவருக்கு அலைபேசியிலிருந்து ஒரு அழைப்பு வந்துள்ளது. அதில் பேசியவர் தான் மீன்வளத்துறை அமைச்சர் ஜெயபால் என்றும் தனக்கு ரூ. 45000 பணத்தை கரூர் வைஸ்யா வங்கியில் செலுத்தும்படியும் கூறியுள்ளார். அத்துடன் வங்கி கணக்கு எண்ணையும் அளித்துள்ளார்.

ஆனால் செல்வகுமார் இதனை பொருட்படுத்தாததுடன் பணத்தையும் செலுத்தவில்லை. இதனையடுத்து அந்த நபர் மீண்டும் அழைத்து செல்வகுமாரை மிரட்டினாராம்.

இதுகுறித்து ஜோசப் செல்வகுமார் அளித்த புகாரின் பேரில் வேளாங்கண்ணி போலீஸார் வழக்கு பதிந்து விசாரித்து வருகின்றனர்.