ஆம் ஆத்மி தனித்துப் போட்டி

ஆம் ஆத்மி கட்சி எப்போதும் தனித்தே போட்டியிடும் என்றார் அந்தக் கட்சியின் மாநிலச் செயலர் ஜோசப் ராஜா.
 தஞ்சாவூர் கீழஅலங்கத்தில் வெள்ளிக்கிழமை நடைபெற்ற அந்தக் கட்சியின் மாவட்ட அலுவலகத் திறப்பு விழாவில் பங்கேற்ற பின்னர், செய்தியாளர்களிடம் அவர் கூறியதாவது: தமிழகத்தில் திராவிடக் கட்சிகளுக்கு மாற்று ஆம் ஆத்மி கட்சிதான். எந்தக் காரணத்துக்காகவும் கூட்டணி வைக்க மாட்டோம்.
 இப்போது, கட்சியின் கட்டமைப்பைப் பலப்படுத்தும் பணி மேற்கொள்ளப்பட்டு வருகிறது. இந்த மாத இறுதியில் அல்லது ஏப்ரல் முதல் வாரத்தில் கட்சியின் அகில இந்திய தலைவர்கள் தமிழகத்துக்கு வருகின்றனர். இந்தத் தேர்தலில் போட்டியிட முழு முயற்சியில் ஈடுபட்டுள்ளோம். அவ்வாறு போட்டியிட்டால், 234 தொகுதிகளிலும் போட்டியிடுவோம் என்றார் அவர்.