ஜெயலலிதா இறந்த பிறகு ஊழல் பற்றி கமலஹாசன் பேசுவது ஏன்?

ஜெயலலிதா இறந்த பிறகு கமலஹாசன் ஊழல் பற்றி பேசுவதற்கான காரணம் என்ன என, நாம் தமிழர் கட்சித் தலைவர் சீமான் கேட்டுள்ளார்.
ராமேசுவரத்தில் திரையுலகத்தினர் சார்பில், கடந்த 2008 ஆம் ஆண்டு இலங்கை தமிழர்களுக்கு ஆதரவாக நடந்த பொதுக்கூட்டத்தில், இந்திய இறையாண்மைக்கு எதிராகப் பேசியதாக திரைப்பட இயக்குநர்கள் சீமான், அமீர் ஆகியோர் மீது க்யூ பிரிவு போலீஸார் வழக்குப் பதிவு செய்திருந்தனர்.
இந்த வழக்கு, ராமநாதபுரம் மாவட்டக் கூடுதல் அமர்வு நீதிமன்றத்தில் நடைபெற்று வருகிறது. வழக்கு விசாரணையில் ஆஜராவதற்காக, இருவரும் ராமநாதபுரம் நீதிமன்றத்துக்கு வியாழக்கிழமை வந்திருந்தனர். இவர்களிடம் விசாரணை மேற்கொண்ட நீதிபதி லிங்கேசுவரன், இருவரையும் ஆகஸ்ட் 30 ஆம் தேதி மீண்டும் ஆஜராகுமாறு உத்தரவு பிறப்பித்தார்.
அதையடுத்து, நீதிமன்றத்திலிருந்து வெளியே வந்த சீமான் செய்தியாளர்களிடையே தெரிவித்ததாவது:
பிரிந்து கிடக்கும் அதிமுக அணிகளை இணைப்பதில் பாஜக அதிக ஆர்வம் காட்டி வருகிறது. இது, பா.ஜ.க.வுக்கு தேவையில்லாத வேலையாகும். தமிழகத்தில் பா.ஜ.க.வால் தலையெடுக்கவே முடியாது. அதேபோல், அதிமுகவுக்கும் எதிர்காலம் கிடையாது.
ஊழல்வாதியான மு.க. ஸ்டாலினை அருகில் வைத்துக்கொண்டே ஊழலை ஒழிப்போம் என கமலஹாசன் கூறுவதில் அர்த்தமில்லை. ஊழலுக்காக கருணாநிதியும், ஜெயலலிதாவும் சிறைக்குச் சென்றபோது, கமலஹாசன் ஒன்றும் பேசவில்லை.
தற்போது, கருணாநிதி உடல்நலம் சரியில்லாமல் இருக்கிறார். ஜெயலலிதா இறந்துவிட்டார். இப்போது, கமலஹாசன் ஊழலைப் பற்றி பேசி வருகிறார். தமிழகத்தில் கடந்த 50 ஆண்டுகளாக ஆட்சி செய்த கட்சிகள் ஊழல் செய்த போதெல்லாம் ஊழலைப் பற்றி பேசாத கமலஹாசன், இப்போது வாய் திறந்து பேசக் காரணம் என்னவென்று தெரியவில்லை.
ஊழலுக்கு எதிராகக் குரல் கொடுக்கும் எனக்கு கை கொடுங்கள் எனக் கூறி வரும் கமலஹாசன், ஊழலுக்கு எதிராக பலமுறை குரல் கொடுத்துள்ள எனக்கு ஆதரவாக இதுவரை எப்போதும் குரல் கொடுக்கவே இல்லையே. தமிழகத்தில் நீட் தேர்வுக்கு நிரந்தர விலக்கு அளிக்க வேண்டும் என்றார்.