4 அமைச்சர்களின் மாவட்டச் செயலாளர் பதவி பறிப்பு: டிடிவி தினகரன் அறிவிப்பு

நான்கு அமைச்சர்களின் மாவட்டச் செயலாளர் பதவிகளுக்கு புதிய செயலாளர்களை அதிமுக அம்மா அணியின் துணைப் பொதுச் செயலாளர் டிடிவி தினகரன் அறிவித்துள்ளார்.
இது குறித்து அவர் திங்கள்கிழமை வெளியிட்ட அறிவிப்பு: விருதுநகர் மாவட்டச் செயலாளர் பொறுப்பில் உள்ள கே.டி.ராஜேந்திர பாலாஜி, அந்தப் பொறுப்பில் இருந்து நீக்கப்பட்டு, சாத்தூர் தொகுதி எம்.எல்.ஏ. எதிர்க்கோட்டை எஸ்.ஜி.சுப்பிரமணியன் புதிய செயலாளராக நியமனம் செய்யப்பட்டுள்ளார்.
நாமக்கல் மாவட்டச் செயலாளரான பி.தங்கமணி அந்தப் பொறுப்பில் இருந்து நீக்கப்பட்டுள்ளார். அவருக்குப் பதிலாக அமைப்புச் செயலாளர் எஸ்.அன்பழகன் புதிய செயலாளராக நியமிக்கப்பட்டுள்ளார்.
திருச்சி மாநகர் மாவட்டச் செயலாளர் வெல்லமண்டி நடராஜன், திருச்சி புறநகர் மாவட்டச் செயலாளர் டி.ரத்தினவேல் ஆகியோர் அந்தப் பொறுப்புகளில் இருந்து நீக்கப்பட்டுள்ளனர். திருச்சி மாவட்டம் அமைப்பு ரீதியாக மூன்றாகப் பிரிக்கப்படுகிறது. அதன்படி, திருச்சி மாநகர் மாவட்டச் செயலாளராக ஜெ.சீனிவாசனும், வடக்கு மாவட்டச் செயலாளராக ஆர்.மனோகரனும், தெற்கு மாவட்டச் செயலாளராக தொட்டியம் ராஜசேகரும் நியமனம் செய்யப்பட்டுள்ளனர்.
கோவை புறநகர் மாவட்டச் செயலாளர் பொறுப்பிலுள்ள எஸ்.பி.வேலுமணி அந்தப் பொறுப்பிலிருந்து நீக்கப்பட்டுள்ளார். புதிய செயலாளராக கே.சுகுமார் நியமனம் செய்யப்பட்டுள்ளார்.
ராமநாதபுரம் மாவட்டச் செயலாளர் பொறுப்பில் உள்ள எம்.ஏ.முனியசாமி, அந்தப் பொறுப்பில் இருந்து நீக்கப்பட்டு, வி.டி.என்.ஆனந்த் புதிய செயலாளராக நியமிக்கப்பட்டுள்ளார்.
திருப்பூர் மாநகர் மாவட்டச் செயலாளர் பொறுப்பில் உள்ள எம்.எஸ்.எம்.ஆனந்தன், அந்தப் பொறுப்பில் இருந்து நீக்கப்படுகிறார். அவருக்குப் பதிலாக புதிய செயலாளராக திருப்பூர் சி.சிவசாமி நியமனம் செய்யப்பட்டுள்ளார்.
அமைச்சர்கள் எஸ்.பி.வேலுமணி, பி.தங்கமணி, முன்னாள் அமைச்சர்கள் மாதவரம் வி.மூர்த்தி, டி.கே.எம்.சின்னையா, முக்கூர் என்.சுப்பிரமணியன் ஆகியோர் அமைப்புச் செயலாளர் உள்ளிட்ட பொறுப்புகளில் இருந்தும் விடுவிக்கப்பட்டுள்ளனர்.