மு.க.ஸ்டாலினுடன் அதிமுக கூட்டணி எம்எல்ஏக்கள் சந்திப்பு

திமுக செயல்தலைவர் மு.க.ஸ்டாலினை அதிமுக கூட்டணி எம்.எல்.ஏ.க்கள் தமிமுன் அன்சாரி, தனியரசு, கருணாஸ் ஆகியோர் செவ்வாய்க்கிழமை சந்தித்தனர்.
மனிதநேய ஜனநாயகக் கட்சித் தலைவர் தமிமுன் அன்சாரி, கொங்கு இளைஞர் பேரவைத் தலைவர் தனியரசு, முக்குலத்தோர் புலிப்படை தலைவர் கருணாஸ் ஆகியோர் அண்ணா அறிவாலயத்துக்குச் செவ்வாய்க்கிழமை வந்து மு.க.ஸ்டாலினை சந்தித்து அரை மணி நேரம் அரசியல் நிலவரம் குறித்துப் பேசினர்.
பின்னர் செய்தியாளர்களிடம் தமிமுன் அன்சாரி கூறியது: பேரறிவாளனை பரோலில் விடுவிக்க வேண்டும் என்று சட்டப்பேரவையில் எங்களோடு இணைந்து குரல் கொடுத்ததற்காக மு.க.ஸ்டாலினுக்கு நன்றி தெரிவித்தோம். எம்ஜிஆர் நூற்றாண்டையொட்டி 10 ஆண்டுகளுக்கு மேல் சிறையில் உள்ளவர்களை விடுவிக்க வலியுறுத்த வேண்டும் என்று கோரினோம். அதற்கு ஸ்டாலினும் வலியுறுத்துவதாகக் கூறினார்.
மற்றபடி, பொதுவான அரசியல் விவகாரங்கள் குறித்தே பேசினோம். திராவிடக் கட்சிகளை அழித்துவிட வேண்டும் என்று பாஜக முயற்சிக்கிறது. முதலில் அதிமுகவையும், அடுத்தது திமுகவையும் அழிக்கப் பார்க்கிறது. இந்த நேரத்தில் திராவிடக் கட்சிகளைக் காக்க வேண்டிய கடமை இருக்கிறது எனவும் அவரிடம் (ஸ்டாலின்) கூறினோம். அவரும் ஆமோதித்தார்.