இட்லி அவிப்பதுபோல அல்ல மின் திட்டம்: பேரவையில் எழுந்த சிரிப்பலை

மின் திட்டம் அமைப்பது என்பது இட்லி அவிப்பது போன்ற எளிதான பணி இல்லை என திமுக எம்.எல்.ஏ. ஆஸ்டின் குறிப்பிட்டதால் சட்டப்பேரவையில் சிரிப்பலை எழுந்தது.
மின்சாரத் துறை மானியக் கோரிக்கை மீதான விவாத்தில் திமுக உறுப்பினர் ஆஸ்டின் பேசும்போது, சம்சாரம் இல்லாமல்கூட ஒரு மனிதன் இருந்து விடலாம். ஆனால் மின்சாரம் இல்லாமல் ஒரு நாள்கூட மனிதனால் இருக்க முடியாது என்றார்.
அதன் பிறகு, இட்லித் தட்டில் மாவை ஊறி, இட்லியை எளிதாக அவித்துவிடலாம். ஆனால், மின்திட்டங்கள் அமைப்பது என்பது அப்படிப்பட்டது இல்லை என்றார்.
அப்போது, பேரவைத் தலைவர் தனபால் குறுக்கிட்டு, திமுக உறுப்பினருக்கு சமைக்கவும் நன்றாகத் தெரியும் போலிருக்கிறது என்றார்.
அதற்கு ஆஸ்டின், எல்லாம் தெரிந்தவர்கள்தான் திமுகவினர் என்றார். இதனால் அவையில் பலத்த சிரிப்பலை ஏற்பட்டது.