ஜெயலலிதா மரணம்: அப்பல்லோ மருத்துவர் ஆணையத்தில் விளக்கம்

முன்னாள் முதல்வர் ஜெயலலிதா மரணம் தொடர்பாக அப்பல்லோ மருத்துவமனையின் இரைப்பை சிறப்பு நிபுணரான மருத்துவர் பழனிச்சாமி விசாரணை ஆணையத்தில் திங்கள்கிழமை ஆஜராகி விளக்கம் அளித்தார்.
முன்னாள் முதல்வர் ஜெயலலிதா மரணம் தொடர்பாக ஓய்வுபெற்ற நீதிபதி ஆறுமுகசாமி தலைமையில் விசாரணை ஆணையத்தை தமிழக அரசு அமைத்துள்ளது. இந்த ஆணையத்தில் இதுவரை 40-க்கும் மேற்பட்டோர் ஆஜராகி விளக்கம் அளித்துள்ளனர். சசிகலாவுக்கு எதிராக ஆணையத்தில் பிரமாணப் பத்திரம், சாட்சியம் அளித்தவர்களிடமும் அவர் தரப்பு வழக்குரைஞர்கள் குறுக்கு விசாரணை நடத்தி வருகின்றனர்.
அப்பல்லோ மருத்துவர் ஆஜர்: அப்பல்லோ மருத்துவமனையில் ஜெயலலிதா அனுமதிக்கப்பட்டிருந்தபோது, அவருக்கு இரைப்பை நிபுணரான மருத்துவர் பழனிச்சாமி சிகிச்சை அளித்தார். அதனடிப்படையில், அவருக்கு அண்மையில் ஆணையம் அழைப்பாணை அனுப்பியிருந்தது. இதைத் தொடர்ந்து, விசாரணை ஆணையத்தில் திங்கள்கிழமை ஆஜரான மருத்துவர் பழனிச்சாமியிடம் ஜெயலலிதாவுக்கு அளிக்கப்பட்ட சிகிச்சை குறித்து நீதிபதி ஆறுமுகசாமி சுமார் 2 மணி நேரம் விசாரணை நடத்தினார். அப்பல்லோ மருத்துவமனையில் பணியாற்றிய செவிலியர் அனுஷா என்பவருக்கும் ஆணையம் அழைப்பாணை அனுப்பி இருந்தது. ஆனால், அவர் வெளிநாட்டில் உள்ளதால் திங்கள்கிழமை ஆஜராகவில்லை.
குறுக்கு விசாரணை: அப்பல்லோ மருத்துவர்கள் அர்ச்சனா, பிரசன்னா, செவிலியர்கள் ரேணுகா, ஷீலா ஆகியோர் விசாரணை ஆணையத்தில் ஆஜராகி விளக்கம் அளித்திருந்தனர். இதையடுத்து, அவர்களிடம் சசிகலா தரப்பு வழக்குரைஞர்கள் செவ்வாய்க்கிழமை குறுக்கு விசாரணை நடத்த உள்ளனர்.