ஸ்டெர்லைட் ஆலையை மீண்டும் திறக்க அழுத்தம்: அரசு பணியக் கூடாது

தூத்துக்குடி ஸ்டெர்லைட் ஆலையை மீண்டும் திறப்பதற்கு நிர்வாகத்தின் சார்பில் அளிக்கப்படும் அழுத்தத்துக்கு தமிழக அரசு அடிபணியக் கூடாது என்று பாமக நிறுவனர் ராமதாஸ் வலியுறுத்தியுள்ளார்.
இது தொடர்பாக அவர் திங்கள்கிழமை வெளியிட்ட அறிக்கை: தூத்துக்குடியில் ஸ்டெர்லைட் ஆலையை மீண்டும் திறப்பதற்கான முயற்சிகளில் ஆலை நிர்வாகம் தீவிரமாக ஈடுபட்டுள்ளது. தொடக்கத்திலிருந்தே தங்களுக்கு ஆதரவாக செயல்பட்டு வந்த ஒரு பிரிவினர் மூலம், தூத்துக்குடி மாவட்ட மக்களின் முன்னேற்றத்துக்கும் வேலைவாய்ப்புக்கும் ஸ்டெர்லைட் ஆலை அவசியம் என்பதால் அதை மீண்டும் திறக்க உத்தரவிட வேண்டும் என்று மாவட்ட ஆட்சியரிடம் மனு கொடுக்க வைக்கும் நாடகம் வாரந்தோறும் அரங்கேற்றப்பட்டு வருகிறது.
இத்தகைய நாடகங்களுக்கு தமிழக அரசும் காவல் துறையும் மறைமுகமான ஆதரவை அளித்து வருகின்றன. 22 ஆண்டுகளாக ஏற்பட்ட அழிவுகளை நினைத்துப் பார்த்தால் ஸ்டெர்லைட் ஆலையை ஒருபோதும் திறக்கக் கூடாது என்பதில் உள்ள நியாயத்தைப் புரிந்து கொள்ள முடியும். எனவே, ஸ்டெர்லைட் நிர்வாகத்தால் தொடர்ந்து அளிக்கப்படும் அழுத்தங்களுக்கு தமிழக அரசு பணிந்து விடக்கூடாது. பசுமைத் தீர்ப்பாயத்தில் தொடரப்பட்டுள்ள வழக்கை முறியடித்து ஆலை நிரந்தரமாக மூடப்பட்டிருப்பதை அரசு உறுதி செய்ய வேண்டும் என்று அவர் கூறியுள்ளார்.