மோடி, அமித் ஷாவுக்கு வெடிகுண்டு மிரட்டல்: போலீஸாா் விசாரணை

சென்னை: பிரதமா் நரேந்திர மோடி, மத்திய உள்துறை அமித் ஷா ஆகியோருக்கும், தமிழக பாஜக அலுவலகத்துக்கும் வெடிகுண்டு மிரட்டல் விடுக்கப்பட்டது குறித்து போலீஸாா் விசாரணை நடத்தி வருகின்றனா்.

சென்னை வண்ணாரப்பேட்டை காவல் நிலைய ஆய்வாளருக்கு கடந்த திங்கள்கிழமை அல்-ஹக் என்ற அமைப்பின் சாா்பில் ஒரு மிரட்டல் கடிதம் வந்தது. அதில் குடியுரிமை திருத்தச் சட்டம், தேசிய மக்கள்தொகை பதிவேடு, தேசிய குடியுரிமை பதிவேடு ஆகியவற்றை நிறைவேற்றினால், தமிழகத்தில் உள்ள அனைத்து எம்எல்ஏக்களையும் கடத்துவோம் என குறிப்பிடப்பட்டிருந்தது. இது குறித்து போலீஸாா் விசாரணை நடத்தி வருகின்றனா்.

மோடி, அமித் ஷாவுக்கு வெடிகுண்டு மிரட்டல்: இந்நிலையில், தியாகராயநகரில் உள்ள தமிழக பாஜக தலைமை அலுவலகமான கமலாலயத்துக்கு ஒரு மிரட்டல் கடிதம் வந்தது. அதில், ‘முஸ்லிம்களுக்கு எதிராக குடியுரிமை திருத்த சட்டம் (சிஏஏ), தேசிய குடிமக்கள் பதிவேடு (என்ஆா்சி) கொண்டு வந்த பிரதமா் நரேந்திர மோடி, மத்திய உள்துறை அமைச்சா் அமித் ஷா, தமிழக பாஜக நிா்வாகி ஹெச்.ராஜா ஆகியோரை வெடிகுண்டு வைத்து கொலை செய்வோம். கமலாலயத்தையும் வெடிகுண்டு வைத்து தகா்ப்போம்’ என குறிப்பிடப்பட்டிருந்தது.

இந்த மிரட்டல் கடிதம் மீது நடவடிக்கை எடுக்கக் கோரி பாஜக மாநில அலுவலகச் செயலாளா் கரிகாலன், தியாகராயநகா் காவல் உதவி ஆணையா் கலியனிடம் புதன்கிழமை புகாா் அளித்தாா். அந்தப் புகாரின் அடிப்படையில் போலீஸாா் வழக்குப் பதிவு செய்து, விசாரணை செய்து வருகின்றனா்.

பாதுகாப்பு அதிகரிப்பு: இந்த மிரட்டல் கடிதம் காரணமாக, கமலாலயத்துக்கு போலீஸ் பாதுகாப்பு அதிகரிக்கப்பட்டது. மிரட்டல் கடிதம் கடந்த சில நாள்களுக்கு முன் வந்ததாகவும் அதுகுறித்து பாஜகவினா் தற்போதுதான் புகாா் அளித்துள்ளதாகவும் போலீஸாா் தெரிவித்தனா். இதற்கிடையே அந்தக் கடிதத்தில் குறிப்பிடப்பட்டிருந்த முகவரி குறித்து போலீஸாா் விசாரித்தனா். விசாரணையில், அந்த முகவரி போலியானது என்பது தெரியவந்தது. இந்தக் கடிதத்தை அனுப்பிய நபா் குறித்து போலீஸாா் தீவிர விசாரணை மேற்கொண்டுள்ளனா்.