குமாரபாளையத்தில் 14 வயது சிறுமிக்கு பாலியல் தொல்லை: உறவினர் உள்பட 11 பேர் கைது

குமாரபாளையத்தில் 14 வயது சிறுமிக்கு பாலியல் ரீதியான தொல்லை கொடுத்த உறவினர் உள்பட 11 பேரை மகளிர் காவல்துறையினர் கைது செய்துள்ளனர். மேலும், தலைமறைவாக உள்ள மற்றொருவரைத் தேடி வருகின்றனர்.

நாமக்கல் மாவட்டம், குமாரபாளையம் பகுதியைச் சேர்ந்த 14 வயது சிறுமி தனது தாய் மற்றும் இரு சகோதரிகளுடன் வசித்து வந்தார். 6-ம் வகுப்பு படித்துள்ள இச்சிறுமி  குடும்ப வறுமை காரணமாக  வீட்டு வேலைகளுக்குச் சென்று வந்துள்ளார். இச்சிறுமிக்கு அதே பகுதியைச் சேர்ந்த உறவினர் உள்பட பலர் பாலியல்  தொல்லை கொடுத்து வந்துள்ளனர். 

இதுகுறித்து, நாமக்கல் மாவட்ட குழந்தைகள் நல அலுவலருக்கு தகவல் தெரிவிக்கப்பட்டது. இதன்பேரில் விசாரணை நடத்திய குழந்தைகள் நல அலுவலர்கள் திருச்செங்கோடு அனைத்து மகளிர் காவல் நிலையத்தில் புகார் அளித்தனர். இதுகுறித்து வழக்குப் பதிவு செய்த மகளிர் காவல் நிலைய காவல்துறையினர் பாதிக்கப்பட்ட சிறுமியிடம் விசாரணை நடத்தினர். அப்போது, தன்னை பாலியல் ரீதியான துன்புறுத்தலில் ஈடுபட்டோர் குறித்துத் தெரிவித்துள்ளார்.

அடுத்தடுத்து 12 பேரின் பெயர்களைப் பட்டியலிட்ட அச்சிறுமி அளித்த தகவலைக் கேட்டு மகளிர் போலீஸார் அதிர்ச்சி அடைந்தனர். இதையடுத்து, திங்கள்கிழமை இரவு சிறுமியை பாலியல் தொல்லைக்கு உட்படுத்திய 11 பேரை மகளிர் காவல் நிலைய காவல்துறையினர் கைது செய்தனர். தலைமறைவான மற்றொருவரைத் தேடி வருகின்றனர்.

14 வயதான சிறுமிக்கு பாலியல் தொல்லை கொடுத்ததாக குமாரபாளையம் பகுதியில் 11 பேர் கைது செய்யப்பட்ட சம்பவம் பரபரப்பை ஏற்படுத்தியுள்ளது.