திருச்சி - நாகப்பட்டினம் பகுதி வேளாண் தொழில் பெருந்தடமாக அறிவிக்கப்படும்

தஞ்சாவூா், திருவாரூா், மயிலாடுதுறை, நாகப்பட்டினம், திருச்சி போன்ற மாவட்டங்களை உள்ளடக்கிய காவிரி டெல்டா பகுதியில், அரிசி, பயறுவகைகள், வாழை, தென்னை போன்ற விளைபொருள்கள் ஆண்டு முழுவதும் உற்பத்தியாகின்றன.

இந்தப் பகுதிகளில் உற்பத்தியாகும் விளைபொருள்களை மூலப் பொருள்களாகக் கொண்டு அரிசி ஆலைகள், பயறு உடைக்கும் நிலையங்கள், எண்ணெய் பிழியும் ஆலைகள், கயிறு ஆலைகள் போன்ற பல்வேறு மதிப்புக்கூட்டப்பட்ட பொருள்களை உற்பத்தி செய்யும் சிறு தொழிற்சாலைகள் காவிரி டெல்டா பகுதிகளில் நிறைய எண்ணிக்கையில் உருவானால், இப்பகுதியில் உள்ள வேளாண் மக்கள் வாழ்வும் வேளாண் தொழிலாளா்களின் வாழ்வும் வளமாகும். எனவே, இந்தப் பகுதிகளில் வேளாண்மை தொடா்பான தொழிற்சாலைகள் உருவாகி, வளா்ச்சியடைவதற்காக, திருச்சி-நாகப்பட்டினம் மாவட்டத்துக்கு இடையேயான பகுதியை வேளாண் தொழிற்சாலைகளுக்கான பெருந்தடமாக அறிவிக்கை செய்ய இந்த அரசு முடிவு செய்துள்ளது.

இம்மாவட்டங்களில் வேளாண் தொழில்கள் மேம்பட இடையூறாக உள்ள உள்கட்டமைப்பு இடைவெளியைச் சரிசெய்யவும், புதியதாக தொழில் உள்கட்டமைப்புகளை உருவாக்கவும், மேலும் புதிய தனியாா் முதலீடுகளை இப்பகுதிகளில் ஈா்க்கவும் இத்தடம் உதவும்.

இந்த அறிவிப்புக்கு செயல்வடிவம் கொடுக்கும் வண்ணம் இந்தப் பகுதிகளில் பல்வேறு வேளாண் சாா்ந்த தொழில் நிறுவனங்கள் உருவாவதற்கு ஏதுவாக குறு, சிறு மற்றும் நடுத்தரத் தொழில் நிறுவனங்கள் துறையின் உதவியுடன் இயங்கிவரும் தொழிற்பேட்டைகளை மேம்படுத்தியும், புதிய தொழிற்பேட்டைகளை உருவாக்கியும், போக்குவரத்து வசதிகளை வலுப்படுத்தி சந்தைகள் மற்றும் துறைமுகங்களை இணைத்தும், அடிப்படை மின்சார வசதிகளை பெருக்கியும் பல்வேறு நடவடிக்கைகளை தமிழக அரசு மேற்கொள்ளும்.