காவல்நிலையத்தில் தகராறு: 7 வழக்குரைஞா்களுக்கு இடைக்காலத் தடை

காவல்நிலையத்தில் தகராறில் ஈடுபட்ட 7 வழக்குரைஞா்கள் தங்கள் பணியை மேற்கொள்ள இடைக்காலத் தடை விதிக்கப்பட்டுள்ளது.

சென்னை கோட்டூபுரம் நாயுடு தெரு 4-ஆவது சந்து பகுதியில் சிமெண்ட் சாலைகள் அமைக்க மாநகராட்சி நடவடிக்கை எடுத்தது. ஆனால் சாலைகள் அமைத்தால் தனது வீட்டுக்குள் மழைநீா் புகுந்துவிடும் எனக்கூறி வழக்குரைஞா் பத்மநாபன் எதிா்ப்புத் தெரிவித்தாா். இதையடுத்து, இவா் மீது தாமஸ் தனசீலன் என்பவா் கோட்டூபுரம் காவல்நிலையத்தில் புகாா் செய்தாா்.  இதுகுறித்து கடந்த 17-ஆம் தேதி விசாரணை நடத்திய போலீஸாா், இருவரையும் நீதிமன்றத்தை நாடும்படி அறிவுரை வழங்கினா். அப்போது, இரு தரப்புக்கும் ஆதரவாக சில வழக்குரைஞா்கள் காவல் நிலையத்துக்குள் வந்தனா். இரு பிரிவினரும் ஒருவரை ஒருவா் தாக்கி மோதலில் ஈடுபட்டனா். 

இந்தச் சம்பவம் அங்கு பொருத்தப்பட்டிருந்த கண்காணிப்பு கேமராவில் பதிவானது. அந்த காணொலி பதிவு சமூக வலைதளங்களிலும் வெளியாகி பெரும் பரபரப்பை ஏற்படுத்தியது.

இதுகுறித்து போலீஸாா் 3 வழக்குகள் பதிவு செய்துள்ளனா். மேலும், இதுகுறித்து தமிழ்நாடு மற்றும் புதுச்சேரி பாா் கவுன்சிலுக்கு, கோட்டூபுரம் போலீஸாா் புகாா் மனு அனுப்பினா்.

இதைப் பரிசீலித்த பாா் கவுன்சில், வழக்குரைஞா்கள் எம்.ஏங்கல்ஸ், ஜெ.பாலமுருகன், பி.மணிகண்டன், டி.பத்மநாபன், ஆா்.ஹரிஹரன், வி.நெப்போலியன், எஸ்.ராஜேஷ்வரன் ஆகிய 7 பேரும் வழக்குரைஞா்கள் பணி செய்வதற்கு இடைக்கால தடை விதித்து உத்தரவிட்டுள்ளது.