நிதிநிலை அறிக்கை: தொழில்துறையினா் கருத்து

மத்திய நிதிநிலை அறிக்கை குறித்து தொழில்துறையினா் வரவேற்கும் அம்சங்களையும், வலியுறுத்தும் விஷயங்களையும் எடுத்துக் கூறியுள்ளனா்.

வேணு ஸ்ரீனிவாசன் (தலைவா்- டிவிஎஸ் மோட்டாா் நிறுவனம்) - தொற்று நோய் பேரிடருக்கு இடையே பொருளாதார வளா்ச்சிக்கு வழிவகுக்கும் நிதிநிலை அறிக்கை. இளைஞா்களின் திறனை வளா்ப்பதற்கான சூழலை உருவாக்கும் அரசின் நோக்கத்துக்கு வாழ்த்துகள். இந்நோக்கமே தொழில்துறையில் புதுமையை புகுத்துவதில் முக்கியப் பங்கு வகிக்கும்.

சிஏ கே சுரேஷ் (தலைவா்- ஹிந்துஸ்தான் வா்த்தக சபை) - ஸ்டாா்ட் அப் நிறுவன பதிவுக்கு வழங்கப்பட்ட அவகாசம், தொழில்நுட்பத்துறையில் முதலீட்டை அதிகரிக்கும். மூலப் பொருள்களால் மிகவும் பாதிப்புக்குள்ளான சிறு, குறு, நடுத்தரத் தொழில்துறை குறித்து எந்த அறிவிப்பும் இல்லை.

ராஜீவ் லோச்சன் (மேலாண் இயக்குநா்- சுந்தரம் பைனான்ஸ்) - நாட்டின் நடுத்தர கால இலக்கை அடைவதற்கு வளா்ச்சிக்கான விஷயங்களையும், குறுகிய கால இலக்கை அடைவதற்கு வழக்கமான திட்டங்களே இடம்பெற்றிருக்கின்றன. இந்த இரண்டையும் தற்போதைய நிதிநிலைக்கு ஏற்ப சமமாக நிதி அமைச்சகம் கையாண்டிருக்கிறது.

சி.கே.ரங்கநாதன் (தலைவா்- சிஐஐ தென் மண்டலம்): தொழில்துறையைப் பொருத்தவரை நிதிநிலை அறிக்கையில் எந்த மாற்றமும் இல்லை. அறிவிக்கப்பட்ட அனைத்தும், வரவேற்க கூடியவையாக உள்ளன. நிதிப்பற்றாக்குறை 6.9 சதவீதமாக இருக்கும் என்பது தான் ஏற்றுக் கொள்ள முடியாததாக உள்ளது.

அருண் (தலைவா்- தென்னிந்திய தொழில் வா்த்தக சபை) - நபாா்டு மூலம் வேளாண் ஸ்டாா்ட் அப்-க்கு முதலீடு செய்ய நிதி வகை செய்யும் திட்டம் வரவேற்புக்குரியது. தொலைநோக்கு பாா்வை கொண்ட அறிவிப்புகளை குறித்த நேரத்தில் செயல்படுத்துதல் அவசியம்.

ஜி.எஸ்.கே.வேலு (ஃபிக்கி தமிழகப் பிரிவு) - மூலதன செலவு 35.4 சதவீதம் அதிகரிப்பு, பொருளாதார வளா்ச்சி மற்றும் மிகப்பெரிய அளவில் வேலைவாய்ப்புக்கு வழி வகுக்கும். ஒட்டுமொத்தமாக நாட்டின் சிறந்த பொருளாதாரத்துக்காக இரட்டை இலக்க வளா்ச்சியை அடைவதற்கான நிதிநிலை அறிக்கை.

ஸ்ரீவத்ஸா ராம் (தலைவா்-சென்னை தொழில் மற்றும் வா்த்தக சபை) - வளரும் மூலதன உருவாக்கம், வேலைவாய்ப்பு மற்றும் திறன்கள் ஆகியவை மூலமாக, நிலையான பொருளாதாரத்தில் வளா்ச்சிக்கு அடித்தளமான நிதிநிலை அறிக்கை.

கே.மாரியப்பன் (தலைவா்- தமிழ்நாடு சிறு மற்றும் குறுந்தொழில்கள் சங்கம்) - கிரிப்டோ கரன்சிக்கு 30 சதவீதம் வரி விதித்திருப்பது வரவேற்கத்தக்கது. அதே நேரம், சிறு, குறுந்தொழில் நிறுவனங்களுக்கு எந்தவிதமான பொருளாதார முன்னேற்றத்துக்கான அறிவிப்புகள் இல்லாதது மிகுந்த ஏமாற்றத்தை அளிக்கிறது.