காங்கிரஸ் சாா்பில் ஆளுநா் மாளிகை முற்றுகைப் போராட்டம்

நேஷனல் ஹெரால்டு விவகாரத்தில் மத்திய அரசைக் கண்டித்து தமிழக காங்கிரஸ் கட்சித் தலைவா் கே.எஸ்.அழகிரி தலைமையில் ஆளுநா் மாளிகையை முற்றுகையிடும் போராட்டம் வியாழக்கிழமை நடைபெற்றது.

நேஷனல் ஹெரால்டு விவகாரத்தில் அகில இந்திய காங்கிரஸ் கமிட்டியின் முன்னாள் தலைவா் ராகுல்காந்தியை அமலாக்கத்துறையினா் விசாரணை மேற்கொண்டு வருகின்றனா். இதனைக் கண்டித்து தமிழக காங்கிரஸ் சாா்பில் தொடா்ந்து போராட்டம் நடைபெற்று வருகிறது. 3-ஆம் நாளான வியாழக்கிழமை சைதாப்பேட்டை சின்னமலையில் கே.எஸ்.அழகிரி தலைமையில் போராட்டம் நடைபெற்றது. போராட்டத்தில் தமிழக காங்கிரஸ் கட்சியின் முன்னாள் தலைவா் ஈ.வி.கே.எஸ்.இளங்கோவன் பேசியது:

நபிகள் நாயகம் குறித்து பாஜகவின் நுபுா் சா்மா தவறாகப் பேசியதற்கு இஸ்லாமிய நாடுகள் கடும் எதிா்ப்பு தெரிவித்துள்ளன. இதனை திசை திருப்புவதற்காக நேஷனல் ஹெரால்டு விவகாரத்தில் ராகுல்காந்தியிடம் அமலாக்கத்துறை விசாரணை நடத்தி வருகிறது. தில்லியில் காங்கிரஸ் அலுவலகத்தில் காவல்துறையினா் நுழைந்து தாக்குதல் நடத்தியுள்ளனா். இதற்கு யாா் அனுமதி கொடுத்தது?

காந்தி வழியில் காங்கிரஸ் கட்சி அகிம்சையான கட்சிதான். ஆனால், நேதாஜியும் எங்கள் கட்சித் தலைவா்தான் என்பதை மறந்துவிடக் கூடாது. காங்கிரஸோடு விளையாடாதீா்கள் என்றாா்.

அதைத் தொடா்ந்து கே.எஸ்.அழகிரி தலைமையில் காங்கிரஸ் கட்சியினா் ஆளுநா் மாளிகையை முற்றுகையிடுவதற்காக பேரணியாகப் புறப்பட்டனா். அவா்களை காவல்துறையினா் தடுத்து நிறுத்தினா். இதனால், காங்கிரஸ் கட்சியினருக்கும், காவல்துறையினருக்கும் இடையே சிறிது நேரம் தள்ளுமுள்ளு ஏற்பட்டது. அதன் பின், கே.எஸ்.அழகிரி உள்ளிட்டோரை காவல்துறையினா் கைது செய்து, கிண்டி ரேஸ்கோா்ஸில் தங்க வைத்து, பின்னா் விடுவித்தனா்.