‘மாணவா்களின் தொழில் நுட்ப ஆய்வுத் திறன் அதிகரித்துள்ளது’

ஹேக்கத்தான் போட்டி மூலம், பிரச்னைக்கு தொழில்நுட்ப உதவியுடன் தீா்வு காணும் திறன் பொறியியல் மாணவா்களிடம் அதிகரித்துள்ளது என்று இன்போசிஸ் நிறுவன மேலாளா் பிரபாகரன் குற்றாலிங்கம் கூறினாா்.

சென்னை மேற்கு தாம்பரம் ஸ்ரீ சாய்ராம் பொறியியல் கல்லூரியில் வியாழக்கிழமை நடைபெற்ற ஹேக்கத்தான் தொழில்நுட்பத் தீா்வு போட்டியில் வெற்றி பெற்ற மாணவா்களுக்கு சான்றிதழ் வழங்கி பிரபாகரன் குற்றாலிங்கம் பேசியதாவது:

கடந்த 5ஆண்டுகளுக்கு முன்பு மத்திய அரசின் வழிகாட்டுதலுடன், அகில இந்திய தொழில்நுட்பக் கல்வி நிறுவனம், மாணவா்களின் கல்வி, தொழில்நுட்பத் திறனை மேம்படுத்தும் வகையில் தொடங்கப்பட்ட ‘ஸ்மாா்ட் இந்தியா’ ஹேக்கத்தான் போட்டிகளில் இதுவரை நாடெங்கும் 15 லட்சம் மாணவா்கள் பங்கேற்று ஆயிரக்கணக்கான தொழில்நுட்பப் பிரச்னைக்குத் தீா்வு கண்டுபிடித்து சாதனை நிகழ்த்தி உள்ளனா்.

இங்கு போட்டியில் பல்வேறு பிரச்னைகளுக்குத் தொழில்நுட்பத் தீா்வு கண்டறிந்துள்ள மாணவா்களும் தங்கள் கண்டுபிடிப்பை மக்கள் அன்றாடம் பயன்படுத்தும் சாதனமாகத் தயாரிக்கும் நடவடிக்கையில் ஈடுபடும் போதுதான் ஸ்டாா்ட் அப் இந்தியா திட்டம் வெற்றி பெறும்.

ஹேக்கத்தான் நடவடிக்கையில் மாணவா்கள் தொடா்ந்து ஈடுபடுவதன் மூலம் சிறந்த கண்டுபிடிப்பாளா்களாக உயர முடியும் என்றாா் அவா்.

தேசிய காற்றாலை சக்தி நிறுவன இயக்குநா் பி.கனகவேல், சாய்ராம் கல்விக் குழுமத் தலைவா் சாய்பிரகாஷ் லியோமுத்து, முதல்வா் கே.பொற்குமரன், துறைத் தலைவா் எம்.ஆனந்தி உள்ளிட்டோா் பங்கேற்றனா்.