மன்னார்குடி ராஜகோபாலசுவாமி கோயில் பங்குனி திருவிழா: வெண்ணைத்தாழி உற்சவம்

திருவாரூர் மாவட்டம் மன்னார்குடி அருள்மிகு ராஜகோபாலசுவாமி கோயிலில் நடைபெற்று வரும் பங்குனிப் பெருவிழாவை முன்னிட்டு வெண்ணைத்தாழி உற்சவம்,செவ்வாய்க்கிழமை மிக சிறப்பாக நடைபெற்றது.

ராஜகோபாலசுவாமி கோயிலில் ஆண்டுதோறும் நடைபெறும் 18 நாள் பங்குனித் திருவிழாவும்,அதனை தொடர்ந்து 12 நாள் விடையாற்றி விழாவும் நடைபெறும். நிகழாண்டின் திருவிழா கடந்த மார்ச்.21-ம் தேதி பெரிய கொடியேற்றத்துடன் தொடங்கி நடைபெற்று வருகிறது.

இதையும் படிக்க.. தனது சொத்து முழுவதையும் ராகுல் காந்திக்கு எழுதி வைத்த மூதாட்டி: ஏன் தெரியுமா?

இதில் முக்கிய நிகழ்வுகளான வெள்ளி ஹம்ச வாகனத்தில் ராஜ அலங்கார சேவை,கோவர்த்தனகிரியில் கண்ணன் திருக்கோலம், மரவுரிராமர் திருக்கோலம், கணடபேரண்ட பட்க்ஷிவாகனம்,வண்ண புஷ்ப பல்லக்கு சேவை, தங்க சூர்யபிரபை ஆகியவை நடைபெற்றது.

16-ம் நாள் திருவிழாவான, இன்று செவ்வாய்க்கிழமை வெண்ணைத்தாழி உற்சவத்தை முன்னிட்டு காலையில் சுவாமி நவநீத சேவையில் சிறப்பு அலங்காரத்தில் எழுந்தருளி, திருக்கோயிலின் நான்கு வீதிகள், மேலராஜவீதி, பெரியக்கடைதெரு, பந்தலடி வழியாக வெண்ணைத்தாழி மண்டபம் சென்றடைந்தார்.

அப்போது சாலையில் இருபக்கங்களிலும் திரண்டிருந்த ஆயிரக்கணக்கான பக்தர்கள் சுவாமி மீது வெண்ணையை தெளித்து,கோபாலா,கோபாலா என பக்தி கோஷம் எழுப்பி பெருமாளை வழிபட்டனர்.

நிகழ்ச்சியில், திருவாரூர் மாவட்ட ஆட்சியர் ப.காயத்ரி கிருஷ்ணன் உள்ளிட்டோர் கலந்துகொண்டனர்.

புதன்கிழமை ருக்மணி, சத்யபாமா சமேதராக உற்சவர் ராஜகோபாலவாமி சிறப்பு அலங்காரத்தில் தேரில் எழுந்தருளும் கோயிலில் வெளிபிரகாரத் தேரோட்டம் மதியம் 2மணிக்கு நடைபெறுகிறது.