சென்னையில் நாளை (ஞாயிற்றுக்கிழமை) திமுக பொதுக்குழுக் கூட்டம் நடைபெற்ற உள்ளதையொட்டி ஏற்பாடுகள் தீவிரமாக நடைபெற்று வருகின்றன.
திமுகவின் 15-ஆவது பொதுத் தோ்தலில் புதிதாகத் தோ்ந்தெடுக்கப்பட்ட பொதுக்குழு உறுப்பினா்களின் கூட்டம் அக். 9-ஆம் தேதி காலை 9 மணிக்கு நடைபெறவுள்ளது. சென்னை அமைந்தகரை பச்சையப்பன் கல்லூரி எதிரில் உள்ள செயின்ட் ஜாா்ஜ் பள்ளி விங்க்ஸ் கன்வென்ஷன் சென்டரில் கூட்டம் நடைபெறவுள்ளது.
புதிதாகத் தோ்ந்தெடுக்கப்பட்ட பொதுக்குழு உறுப்பினா்கள் அனைவரும் கலந்து கொள்ள வேண்டும். இந்தக் கூட்டத்தில் திமுக தலைவா், பொதுச் செயலாளா், பொருளாளா் ஆகிய பொறுப்புகளுக்கான தோ்தல் குறித்தும், தணிக்கைக்குழு உறுப்பினா்களுக்கான தோ்தல் நடவடிக்கைகளும் மேற்கொள்ளப்படும் என்று தனது அறிவிப்பில் துரைமுருகன் தெரிவித்திருந்தார்.
முன்னதாக, திமுக தலைவர் தோ்தலில் போட்டியிட முதல்வா் மு.க.ஸ்டாலின் இன்று தனது வேட்புமனுவை தாக்கல் செய்துள்ளார். இதேபோன்று, பொதுச் செயலாளா் பதவிக்கு அமைச்சர் துரைமுருகனும், பொருளாளா் பதவிக்கு திமுக நாடாளுமன்ற குழுத் தலைவா் டி.ஆா்.பாலுவும் வேட்புமனுவை தாக்கல் செய்தனர்.
திமுக பொதுக் குழுக் கூட்டம் நடைபெற உள்ளதையொட்டி கீழ்ப்பாக்கம் பகுதியில் போக்குவரத்து மாற்றம் செய்யப்படுவதாக சென்னை பெருநகர காவல் துறையின் போக்குவரத்துப் பிரிவு தெரிவித்துள்ளது.
