எம்ஜிஆர் சிலைக்கு இபிஎஸ் மரியாதை!

சென்னை: சென்னை அதிமுக அலுவலகத்தில் உள்ள எம்ஜிஆர் சிலைக்கு அக்கட்சியின் பொதுச் செயலாளர் எடப்பாடி பழனிசாமி மாலை அணிவித்து மரியாதை செலுத்தினார்.

அதிமுக நிறுவனத் தலைவா் முன்னாள் முதல்வா் எம்ஜிஆரின் 107-ஆவது பிறந்த நாள் இன்று கொண்டாடப்பட்டு வருகிறது. அவரது பிறந்த நாள் விழாவை கட்சி தொண்டா்கள், நிா்வாகிகள் எம்ஜிஆரின் சிலை, உருவப் படங்களுக்கு மாலை அணிவித்தும், பொதுமக்களுக்கு இனிப்புகள் வழங்கியும் கொண்டாடி வருகின்றனர்.

இந்த நிலையில், சென்னை ராயப்பேட்டையில் உள்ள அதிமுக தலைமை அலுவலகமான எம்ஜிஆர் மாளிகையில் உள்ள எம்ஜிஆர் சிலைக்கும், ஜெயலலிதா சிலைக்கும் மாலை அணிவித்து எடப்பாடி பழனிசாமி இன்று காலை மரியாதை செலுத்தினார்.

தொடர்ந்து கட்சியின் கொடியை ஏற்றி வைத்தார்.

முன்னதாக சென்னை பசுமைவழிச்சாலையில் செவ்வந்தி இல்லத்தில் எம்ஜிஆரின் திருவுருவப்படத்துக்கு மலர்தூவி இபிஎஸ் மரியாதை செலுத்தினார்.