தமிழகத்தில் 6 இடங்களில் வெயில் சதம்: செப்.20 வரை ஆங்காங்கே மழைக்கு வாய்ப்பு

தமிழகத்தில் சனிக்கிழமை மதுரை உள்பட 6 இடங்களில் வெப்பநிலை 100 டிகிரி ஃபாரன்ஹீட்டுக்கு மேல் பதிவானது. அதே நேரத்தில் ஞாயிற்றுக்கிழமை (செப்.15) முதல் செப்.20-ஆம் தேதி வரை மிதமான மழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.

இது குறித்து அந்த மையம் வெளியிட்டுள்ள செய்திக் குறிப்பு:

தமிழகத்தில் சனிக்கிழமை அதிகபட்சமாக மதுரை விமான நிலையத்தில் 105.08 டிகிரி ஃபாரன்ஹீட் வெப்பநிலை பதிவானது. மதுரை நகரம் - 101.48, தூத்துக்குடி - 101.3, நாகப்பட்டினம் - 100.94, ஈரோடு, பாளைங்கோட்டை - (தலா) 100.04 டிரிகி என மொத்தம் 6 இடங்களில் வெயில் சதமடித்துள்ளது.

இதேபோல், சென்னை நுங்கபாக்கத்தில் 98.24, மீனம்பாக்கத்தில் 99.68 டிகிரி ஃபாரன்ஹீட் பதிவானது.

செப்.15-இல் தமிழகத்தில் ஓரிரு இடங்களில் அதிகபட்ச வெப்பநிலை இயல்பைவிட 2 முதல் 3 டிகிரி செல்சியஸ் அதிகமாக இருக்கும்.

மழைக்கு வாய்ப்பு: மேற்கு திசை காற்றின் வேகமாறுபாடு காரணமாக, தமிழகத்தில் ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் ஞாயிற்றுக்கிழமை (செப்.15) முதல் செப்.20-ஆம் தேதி வரை மிதமான மழை பெய்ய வாய்ப்புள்ளது.

சென்னை மற்றும் புகா் பகுதிகளில் செப்.15, 16 ஆகிய தேதிகளில் மிதமான மழை பெய்ய வாய்ப்புள்ளது. அதிகபட்ச வெப்பநிலை 100 டிகிரி ஃபாரன்ஹீட் வரை இருக்கும்.

மீனவா்களுக்கான எச்சரிக்கை: மன்னாா் வளைகுடா, தென்தமிழக கடலோரப் பகுதிகள், அதையொட்டிய குமரிக் கடலில் செப்.15 முதல் செப்.18 வரை மணிக்கு 65 கி.மீ. வேகத்தில் பலத்த காற்று வீசக்கூடும். இதனால், மீனவா்கள் அந்தப் பகுதிகளுக்கு மீன்பிடிக்கச் செல்ல வேண்டாம் என்று தெரிவிக்கப்பட்டுள்ளது.