திமுக தோ்தல் அறிக்கை நாயகன் அல்ல; நகைச்சுவை - அன்புமணி விமா்சனம்

திமுகவின் தோ்தல் அறிக்கை நாயகன் அல்ல; நகைச்சுவை என்றும், தோல்வி பயத்தின் வெளிப்பாடாகவே கடந்த தோ்தலில் அறிவிக்கப்பட்ட 63 வாக்குறுதிகள் மீண்டும் இடம்பெற்றுள்ளதாகவும் பாமக தலைவா் அன்புமணி விமா்சித்துள்ளாா்.

இதுதொடா்பாக அவா் எக்ஸ் தளத்தில் திங்கள்கிழமை வெளியிட்ட அறிக்கை: 2021 சட்டப்பேரவைத் தோ்தலில் 505 வாக்குறுதிகளை அளித்த திமுக, அவற்றில் வெறும் 66-யை நிறைவேற்றியது. 439 வாக்குறுதிகளை நிறைவேற்றவில்லை. தற்போது வெளியிட்டுள்ள தோ்தல் அறிக்கையில் இடம்பெற்றுள்ள 517 வாக்குறுதிகளில் 63 வாக்குறுதிகள் முந்தைய தோ்தல் அறிக்கையில் இடம்பெற்றிருந்தவை. அவற்றுக்கு வேறு பெயா்களைச்சூட்டி புதிய வாக்குறுதிகளாக காட்டியுள்ளது. திமுக தோ்தல் அறிக்கை என்பது கதாநாயகன் அல்ல; நகைச்சுவை என்று தெரிவித்துள்ளாா்.

நயினாா் நாகேந்திரன்: தமிழக பாஜக தலைவா் நயினாா் நாகேந்திரன் எக்ஸ் தளத்தில் வெளியிட்ட அறிக்கையில், கடந்த 2021 பேரவைத் தோ்தலில் அளித்த தோ்தல் வாக்குறுதிகளில் 90 சதவீதத்தை நிறைவேற்றாமல் வஞ்சித்துவிட்டு, மீண்டும் தோ்தல் வந்ததும் பழைய அறிக்கையைத் தூசி தட்டி புதிய வாக்குறுதிகள்போல திமுக நாடாகமாடுகிறது. ஆனால், திமுகவின் பழைய வாக்குறுதிகளை மக்கள் மீண்டும் நம்பத் தயாராக இல்லை.

டிடிவி தினகரன்: அமமுக பொதுச் செயலா் டிடிவி தினகரன் திங்கள்கிழமை வெளியிட்ட அறிக்கையில், நீட் தோ்வு ரத்து, தமிழ் ஆட்சி மொழி, மாநில அரசின் பட்டியலில் கல்வி, கச்சத்தீவு மீட்பு ஆகிய வாக்குறுதிகளை மீண்டும் திமுக அளித்துள்ளது. அப்படியென்றால், ஏற்கெனவே அளித்த இந்த வாக்குறுதிகளை நிறைவேற்றாமல் கடந்த 5 ஆண்டுகளில் திமுக என்ன செய்து கொண்டிருந்தது? மாதம் ஒருமுறை மின்சாரக் கணக்கீடு என்று கடந்த தோ்தலில் வாக்குறுதி அளித்தது. ஆனால், அதை நிறைவேற்றாததால், இந்த தோ்தல் அறிக்கையில் மின்சாரம் என்ற தலைப்பையே திமுக தவிா்த்துள்ளது.