மறைமலை நகர், சிஎம்டிஏ பூங்கா தற்காலிகப் பேருந்து நிலையங்கள் இனி செயல்படாது!

ஆயுதப் பூஜையை முன்னிட்டு தற்காலிகமாக செயல்பட்ட சிஎம்டிஏ பூங்கா, மறைமலைநகர் பேருந்து நிலையங்கள் வெளியூர் செல்லும் பயணிகள் எண்ணிக்கை குறைந்ததால் இனி செயல்படாது என்று அறிவிக்கப்பட்டுள்ளது.

இது தொடர்பாக போக்குவரத்துக் கழகம் வெளியிட்ட செய்திக் குறிப்பு:

ஆயுதப் பூஜை தொடர் விடுமுறையை முன்னிட்டு, சென்னையிலிருந்து பல்வேறு ஊர்களுக்குச் செல்லும் பொதுமக்களின் வசதிக்காக ஐந்து இடங்களில் (கலைஞர் நூற்றாண்டு பேருந்து முனையம் (KCBT), கிளாம்பாக்கம்; புரட்சித் தலைவர் டாக்டர் எம்.ஜி.ஆர். பேருந்து நிலையம், கோயம்பேடு; மாதவரம் புதிய பேருந்து நிலையம்; சிஎம்டிஏ காலநிலைப் பூங்கா தற்காலிகப் பேருந்து நிலையம் மற்றும் மறைமலைநகர் தற்காலிகப் பேருந்து நிலையம் அமைந்துள்ள பேருந்து நிலையங்களிலிருந்து சிறப்புப் பேருந்துகள் இயக்கப்பட்டு வந்தன.

முக்கியப் பேருந்து இயக்க மாற்றங்கள் (இன்று - அக். 18):

வெளியூர் செல்லும் பயணிகள் எண்ணிக்கை குறைந்ததால் தற்காலிகப் பேருந்து நிலையங்களிலிருந்து இயக்கப்பட்ட வழித்தட பேருந்துகள் கிளாம்பாக்கம் பேருந்து நிலையத்தில் வழக்கமாக இயக்கப்படும் நடை மேடைகளிலிருந்தும் இயக்கப்படுகிறது

திருவண்ணாமலை வழி:

சிஎம்டிஏ காலநிலைப் பூங்கா தற்காலிகப் பேருந்து நிலையத்திலிருந்து திருவண்ணாமலை வழியாக போளூர், சேத்துப்பட்டு, வந்தவாசி ஆகிய இடங்களுக்கு இயக்கப்பட்ட பேருந்துகள், இன்று கிளாம்பாக்கம், கலைஞர் நூற்றாண்டு பேருந்து முனையத்தின் வழக்கமாக இயக்கப்படும் நடைமேடை எண் 7-லிருந்து இயக்கப்படும்.

கும்பகோணம் வழி:

மறைமலைநகர் தற்காலிகப் பேருந்து நிலையத்திலிருந்து கும்பகோணம், நாகப்பட்டினம், தஞ்சாவூர் ஆகிய இடங்களுக்கு இயக்கப்பட்ட பேருந்துகள், இன்று கிளாம்பாக்கம், கலைஞர் நூற்றாண்டு பேருந்து முனையத்தின் வழக்கமாக இயக்கப்படும் நடைமேடை எண் 5-லிருந்து இயக்கப்படும் என்று தெரிவிக்கப்பட்டுள்ளது.