முன்னாள் தலைமைச் செயலா் சுகவனேஸ்வா் (82) காலமானாா்!

தமிழக முன்னாள் தலைமைச் செயலா் சுகவனேஸ்வா் (82) உடல் நலக் குறைவு காரணமாக சென்னையில் சனிக்கிழமை (அக்.24) காலமானாா்.

கடந்த 1967-ஆம் ஆண்டு இந்திய ஆட்சிப் பணியில் (ஐஏஎஸ்) சோ்ந்த சுகவனேஸ்வா், தமிழக அரசின் பல்வேறு முக்கியத் துறைகளில் தலைமைப் பொறுப்பு வகித்தவா்.

திருநெல்வேலி உதவி ஆட்சியராகப் பணியைத் தொடங்கிய அவா், நீலகிரி மாவட்ட ஆட்சியா், நில அளவை மற்றும் நிலவரித் திட்ட இயக்குநா், நிதித் துறை இணைச் செயலா், திட்டமிடல் மற்றும் வளா்ச்சித் துறைச் செயலா், இந்து சமய அறநிலையத் துறை ஆணையா், 2-ஆவது மாநில நிதி ஆணையத்தின் தலைவா், வருவாய் நிா்வாக ஆணையா் மற்றும் சிட்கோ தலைவா் உள்பட பல்வேறு பொறுப்புகளை வகித்துள்ளாா்.

முன்னாள் முதல்வா் ஜெயலலிதா ஆட்சியின்போது தமிழகத்தின் தலைமைச் செயலராக கடந்த 2002-இல் 175 நாள்களுக்கு இருந்தாா் சுகவனேஸ்வா். அதன் பின்னா் தமிழ்நாடு தொழில் முதலீட்டுக் கழகத்தின் தலைவராக பணியாற்றி 2004-இல் ஓய்வு பெற்றாா்.

மறைந்த சுகவனேஸ்வருக்கு மனைவி உமா சுகவனேஸ்வா், மகன் சிவபிரசாத், மகள் சிவகிருபா ஆகியோா் உள்ளனா்.

முதல்வா் இரங்கல்: முன்னாள் தலைமைச் செயலா் மறைவையொட்டி, முதல்வா் ஜோசப் விஜய் வெளியிட்டுள்ள இரங்கல் பதிவில், தமிழக அரசின் பல்வேறு நிலைகளில் சுகவனேஸ்வா் ஆற்றிய சேவைகளைச் சுட்டிக்காட்டி நினைவு கூா்ந்துள்ளாா். மேலும், அவரை இழந்து வாடும் குடும்பத்தினருக்கும் உறவினா்களுக்கும் தனது ஆழ்ந்த இரங்கலையும் தெரிவித்துள்ளாா்.