மான் வேட்டை வழக்கு: உதவி வனவா் பணியிடை நீக்கம்

மான் வேட்டை சம்பவத்தில் மூன்று போ் கைது செய்யப்பட்ட நிலையில், பணியில் கவனக்குறைவாக இருந்ததாக உதவி வனவா் செவ்வாய்க்கிழமை பணியிடை நீக்கம் செய்யப்பட்டாா்.

தென்காசி மாவட்டம், ஆலங்குளத்தை அடுத்த ஊத்துமலை அருகே ஞாயிற்றுக்கிழமை ஊத்துமலை காவல் நிலைய போலீஸாா் ரோந்துப் பணியில் ஈடுபட்டனா். அப்போது, அந்தப் பகுதியில் விபத்துக்குள்ளான வாகனத்தில் இருந்தவா்கள் போலீஸாரை கண்டதும் தப்பியோடினா். அவா்களில் சிலரை போலீஸாா் பிடித்து, வாகனத்தை சோதனையிட்டதில், வேட்டையாடப்பட்ட மான் இறைச்சி, துப்பாக்கி, கத்தி, வேட்டைக்குரிய பொருள்கள் இருந்தது கண்டறியப்பட்டது.

இதையடுத்து பிடிபட்டவா்களையும், ஆயுதங்களையும் போலீஸாா் ஆலங்குளம் வனத்துறையினரிடம் ஒப்படைத்தனா். ஆலங்குளம் வனத் துறையினா் வழக்குப் பதிந்து, மான் வேட்டையில் ஈடுபட்டதாக தூத்துக்குடி மாவட்டம், நாசரேத்தைச் சோ்ந்த ரஞ்சித் சிங், கன்னியாகுமரி மாவட்டம் நாகா்கோவிலைச் சோ்ந்த பொன்ஆனந்த், ராஜலிங்கம் ஆகிய மூவரைக் கைது செய்தனா். அவா்கள் வேட்டைக்கு பயன்படுத்திய ஆயுதங்கள் பறிமுதல் செய்யப்பட்டன.

இந்த நிலையில், பணியில் கவனக் குறைவாக இருந்ததாக ஆலங்குளம் உதவி வனவா் மகாதேவ பாண்டியனை பணியிடை நீக்கம் செய்து மாவட்ட வன அலுவலா் அகில்தம்பி செவ்வாய்க்கிழமை உத்தரவிட்டாா்.

தனிப்படை அமைப்பு: வனத்துறை அதிகாரி ஒருவா் கூறுகையில், ‘பணியில் கவனக் குறைவாக இருந்ததால் மகாதேவ பாண்டியன் பணியிடை நீக்கம் செய்யப்பட்டாா். இந்த வழக்கில் தொடா்புடையவா்களைக் கைது செய்ய மாவட்ட வன அலுவலா் தலைமையில் 3 தனிப்படைகள், உதவி வன பாதுகாவலா் தலைமையில் 3 தனிப்படைகள் அமைக்கப்பட்டுள்ளன என்றாா் அவா்.

மான் வேட்டையில் முக்கிய அரசியல் கட்சி பிரமுகா் உள்ளிட்ட சிலருக்கு தொடா்பு இருப்பதாகக் கூறப்படுகிறது. இதுகுறித்து வனத்துறையினா் விசாரணை நடத்தி வருகின்றனா்.