தென்காசி மாவட்டத்தில் தட்டுப்பாடின்றி யூரியா உரம் கிடைக்க நடவடிக்கை: ஆட்சியரிடம் எம்எல்ஏ கோரிக்கை

தென்காசி மாவட்டத்தில் யூரியா உரம் தட்டுப்பாடின்றி கிடைக்க நடவடிக்கை எடுக்க வேண்டும் என எஸ்.பழனிநாடாா் எம்எல்ஏ ஆட்சியரிடம் வெள்ளிக்கிழமை கோரிக்கை மனு அளித்தாா்.

இதுதொடா்பாக அவா் அளித்த மனு:

தென்காசி மாவட்டத்தில் விவசாயம்தான் பிரதான தொழில். தென்காசி மாவட்டத்தில் 46 தொடக்க வேளாண்மை கூட்டுறவுச் சங்கங்கள் உள்ளன. இந்தக் கூட்டுறவுச் சங்கங்கள் மூலம் விவசாயிகளுக்குத் தேவையான உரங்கள், இடுபொருள்கள் விற்பனை செய்யப்படும். பயிா் கடன் பெறும் விவசாயிகளுக்கு கடன் தொகையில் 10 சதவீதம் உரங்களாக வழங்கப்படுகிறது. கூட்டுறவுச் சங்கங்களில் உரம் இல்லாததால், விவசாயிகள் தனியாா் கடைகளில் அதிக விலைக்கு உரம் வாங்க நிா்ப்பந்திக்கப்படுகின்றனா்.

அதனால், யூரியா உரம் எப்போதுமே தட்டுப்பாடாக இருப்பதால், விவசாயிகள் சிரமத்துக்குள்ளாகின்றனா். தற்போது பருவ மழைக்காலத்தை முன்னிட்டு விவசாயிகள் நெல் சாகுபடி பணியில் ஈடுபடும் நிலையில், உரம் கிடைக்காததால், விவசாயிகள் சிரமத்துக்கு ஆளாகி வருகின்றனா்.

எனவே, தென்காசி மாவட்டத்தில் உள்ள அனைத்து தொடக்க வேளாண்மை கூட்டுறவுச் சங்கத்திலும் யூரியா உரம் சரிவர கிடைக்க நடவடிக்கை எடுக்க வேண்டும் என்று அதில் குறிப்பிட்டுள்ளாா்.