தென்காசி சந்திப்பு ரயில் நிலையத்தில் கழிப்பறை கட்டடத்தை இடமாற்ற எம்.பி. கோரிக்கை

தென்காசி சந்திப்பு ரயில் நிலையத்தில் முன்மொழியப்பட்ட கழிப்பறை கட்டடத்தை இடமாற்றம் செய்யவேண்டும் என ராணி ஸ்ரீகுமாா் எம்.பி. மத்திய ரயில்வே அமைச்சருக்கு கோரிக்கை மனு அனுப்பியுள்ளாா்.

அவா் அனுப்பியுள்ள மனுவில் கூறியிருப்பதாவது:

அம்ரித் பாரத் ரயில் நிலையத் திட்டத்தின் கீழ் தென்காசி சந்திப்பு ரயில் நிலையத்தில் நடைபெற்று வரும் மறுசீரமைப்புப் பணியின் ஒரு பகுதியாக, முன்மொழியப்பட்ட கழிப்பறை கட்டடம், குடியிருப்புப் பகுதிக்கு மிக அருகில் கட்டப்பட்டு வருவதாகத் தெரிவிக்கப்படுகிறது. இது பொது சுகாதாரப் பிரச்னைகளுக்கு வழிவகுத்து, குடியிருப்பாளா்களையும் ரயில்வே இணைப்புச் சாலையை பயன்படுத்தும் பாதசாரிகளையும் பாதிக்கக்கூடும் என்று அப்பகுதி மக்கள் அஞ்சுகின்றனா்.

ரயில் நிலையங்களை நவீனமயமாக்கும் அரசின் முயற்சியை பாராட்டும் அதே வேளையில், முன்மொழியப்பட்ட இடத்தை ஆய்வு செய்து, கழிப்பறை தொகுதியை, குடியிருப்புப் பகுதிகளிலிருந்து தள்ளி, ரயில்வே வளாகத்துக்குள்ளேயே பொருத்தமான மாற்று இடத்துக்கு மாற்ற,தெற்கு ரயில்வே அதிகாரிகளுக்கு உத்தரவிடவேண்டும் என அம்மனுவில் தெரிவித்துள்ளாா்.