போதைப் பொருள் எதிா்ப்பு உறுதிமொழி ஏற்பு நிகழ்வு: அமைச்சா் நாசா் பங்கேற்பு

திருவள்ளூா்: திருவள்ளூா் ஸ்ரீநிகேதன் பள்ளி வளாகத்தில் ‘போதைப் பொருள்கள் இல்லாத தமிழ்நாடு’ என்ற உறுதிமொழி ஏற்பு நிகழ்வில் சிறுபான்மையினா் நலன் மற்றும் வெளிநாடு வாழ் தமிழா் நலத்துறை அமைச்சா் சா.மு.நாசா் பங்கேற்றாா்.

சென்னை நந்தனம் அரசு கலைக்கல்லூரியில் நடைபெற்ற பெருந்திரள் உறுதிமொழி ஏற்பு நிகழ்ச்சி துணை முதல்வா் உதயநிதி ஸ்டாலின் தலைமையில் நடைபெற்றது. இதன் தொடா்ச்சியாக திருவள்ளூா் ஸ்ரீநிகேதன் பள்ளி வளாகத்தில் அமைச்சா் சா.மு.நாசா் காணொலி காட்சி மூலம் நேரலையில் பங்கேற்றாா். அப்போது, அனைவரும் போதைப் பழக்கத்துக்கு எதிரான உறுதிமொழியை ஏற்றுக் கொண்டனா்.

இதேபோல், சுமாா் 2000-க்கும் மேற்பட்ட பள்ளி, கல்லூரி மாணவ, மாணவிகள் விழிப்புணா்வு பெற்றனா்.

பின்னா் பள்ளி மற்றும் கல்லூரி மாணவ, மாணவிகள் (நஅவ சஞ பஞ ஈதமஎந) என்ற வாசக வடிவில் நின்று விழிப்புணா்வு ஏற்படுத்தினா். இதில் ஆட்சியா் மு.பிரதாப், சட்டப்பேரவை உறுப்பினா்கள் வி.ஜி.ராஜேந்திரன்(திருவள்ளூா்), டிஜெ.கோவிந்தராஜன்(கும்மிடிப்பூண்டி), துரை சந்திரசேகா்(பொன்னேரி), காவல் கண்காணிப்பாளா் விவேகானந்த சுக்லா கலந்து கொண்டனா்.

போதை எதிா்ப்பு மன்றம் மூலம் போதைக்கு எதிராக சிறப்பாக விழிப்புணா்வு ஏற்படுத்தியதற்காக அரசு உயா்நிலைப்பள்ளி, ராமதண்டலம், அரசு மகளிா் உயா்நிலைப்பள்ளி-வெள்ளியூா், கே.எல்.கே. அரசு ஆண்கள் மேல்நிலைப்பள்ளி-கும்மிடிபூண்டி, அரசு ஆண்கள் மேல்நிலைப் பள்ளி-பேரம்பாக்கம், இந்து மேல்நிலைப்பள்ளி- திருவள்ளூா், செயின்ட் ஆனிஸ் மெட்ரிக் மேல்நிலைப்பள்ளி, ஸ்ரீசந்திரபிரபு ஜெயின் கல்லூரி-மீஞ்சூா், மகாலட்சுமி மகளிா் கல்லூரி- பருத்திப்பட்டு, ந.அ.கலை மற்றும் அறிவியல் கல்லூரி-திருவேற்காடு, திருமுருகன் கலை மற்றும் அறிவியல் கல்லூரி-கொசவன்பாளையம், இந்து கல்லூரி- பட்டாபிராம், ஸ்ரீதேவி கலை மற்றும் அறிவியல் கல்லூரி-பொன்னேரி, ஸ்ரீநிகேதன் மெட்ரிக் மேல்நிலைப்பள்ளி, பள்ளி மற்றும் கல்லூரி மாணவ, மாணவிகளுக்கு பாராட்டு சான்றிதழ் மற்றும் கேடயங்களை வழங்கி, விழிப்புணா்வு நாடகத்தையும் அமைச்சா் பாா்வையிட்டாா்.

இதில் உதவி ஆணையா் (கலால்) கணேசன், முதன்மைக் கல்வி அலுவலா்(பொ) மோகனா, மாவட்ட கல்வி அலுவலா் (தனியாா் பள்ளிகள்) தேன்மொழி மற்றும் அலுவலா்கள் பங்கேற்றனா்.