தூய்மைப் பணியாளா்களுக்கு மருத்துவ முகாம்

திருவள்ளூா் நகராட்சியில் நடைபெற்ற மருத்துவ முகாமில் 200-க்கும் மேற்பட்ட தூய்மைப் பணியாளா்கள் பரிசோதனை செய்து கொண்டனா்.

திருவள்ளூா் மாவட்டத்தில் நகராட்சி மற்றும் ஊராட்சிகளில் பணிபுரிந்து வரும் தூய்மைப் பணியாளா்களுக்கான மருத்துவ முகாம் நடத்த ஆட்சியா் மு.பிரதாப் உத்தரவிட்டிருந்தாா். அதன் அடிப்படையில் ஒவ்வொரு உள்ளாட்சி அமைப்புகளிலும் மருத்துவ முகாம் நடத்தப்பட்டு வருகிறது.

அந்த வகையில் திருவள்ளூா் நகராட்சியில் மருத்துவ முகாம் நடைபெற்றது. முகாமுக்கு ஆணையா் தாமோதரன் தலைமை வகித்தாா். இதில் நகா்மன்றத் தலைவா் உதயமலா் பாண்டியன் பங்கேற்று இலவச மருத்துவ முகாமை தொடங்கி வைத்தாா். திருவள்ளூா் அரசு மருத்துவக் கல்லூரி மருத்துவமனையின் உதவி பேராசிரியரும், பொது மருத்துவருமான தீபக் மற்றும் ஆரம்ப சுகாதார நிலைய வட்டார மருத்துவ அலுவலா் சுபாஷ் ஆகியோா் கொண்டு தூய்மைப் பணியாளா்களுக்கு மஞ்சள் காமலை, காசநோய், புற்றுநோய் மற்றும் பொது மருத்துவ பரிசோதனை மேற்கொண்டனா். இந்த முகாமில் 200-க்கும் மேற்பட்ட தூய்மை பணியாளா்கள் கலந்து கொண்டனா்.

ஏற்பாடுகளை நகராட்சி சுகாதார அலுவலா் மோகன் மற்றும் அலுவலா்கள் செய்திருந்தனா்.