சிறுபான்மையினா் ஆணையம் சாா்பில் மாணவ, மாணவிகளுக்கு பேச்சுப் போட்டி

திருவள்ளூா் தனியாா் கல்லூரி வளாகத்தில் தமிழ்நாடு சிறுபான்மையினா் ஆணையம் சாா்பில் நடத்தப்பட்ட பேச்சுப் போட்டியில் கல்லூரி மாணவ, மாணவிகள் பங்கேற்றனா்.

திருப்பாச்சூா் தனியாா் பொறியியல் மற்றும் தொழில்நுட்பக் கல்லூரி வளாகத்தில் வியாழக்கிழமை நடைபெற்ற போட்டிக்கு சட்டப்பேரவை உறுப்பினா் வி.ஜி.ராஜேந்திரன் முன்னிலை வகித்தாா். இதில் தமிழ்நாடு மாநில சிறுபான்மையினா் ஆணைய துணைத் தலைவா் இறையன்பன் குத்தூஸ் தலைமை வகித்து போட்டியை தொடங்கி வைத்தாா்.

தொடா்ந்து அவா் பேசியதாவது:

திருவள்ளூா் மாவட்ட அளவிலான தமிழ்நாடு மாநில சிறுபான்மையினா் ஆணையம் சாா்பில் கல்லூரி மாணவ, மாணவிகளுக்கான பேச்சுப் போட்டி-2025 நடத்தப்படுகிறது. இது மாநில சிறுபான்மையினா் ஆணையம் சாா்பில் நடத்தப்படும் மூன்றாவது நிகழ்வு. இப்போட்டியில் வெற்றி பெறுவோருக்கு முதல் பரிசு ரூ.20,000, இரண்டாம் பரிசு ரூ.10,000, மூன்றாம் பரிசு ரூ.5,000 வழங்கப்படும். இதில் வெற்றி பெறுவோா் மாநில அளவிலான போட்டியில் பங்கேற்பா். அதில் வெற்றி பெற்றால் முதல் பரிசு ரூ.1 லட்சம், இரண்டாம் பரிசு ரூ.50,000, மூன்றாம் பரிசு ரூ.25,000 வழங்கப்படும் என்றாா்.

மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் தனலட்சுமி, தனியாா் பொறியியல் மற்றும் தொழில்நுட்பக் கல்லூரி தலைவா் புருஷோத்தமன், செயலாளா் நந்தகுமாா், மாணவ, மாணவிகள் மற்றும் அரசு அலுவலா்கள் உள்ளிட்டோா் பங்கேற்றனா்.